Истиқболли лойиҳалар миллий агентлиги томонидан крипто-дўкон фаолиятини амалга ошириш учун «Crypto Trade NET» ва «Crypto Market» компанияларига биринчи лицензиялар берилди. Бу ҳақда агентлик матбуот хизмати хабар берди.
Тегишли маълумотлар лицензияларнинг электрон реестрига белгиланган тартибда киритилган ҳамда агентликнинг расмий веб-саҳифасида фойдаланиш учун очиқ ҳисобланади.
Маълумот учун, лицензия олган компаниялар Марказий Осиё ва МДҲ ҳудудидаги биринчи крипто-дўконлар ҳисобланади.
Шунингдек, агентлик фуқароларни ҳушёр бўлишга чақириб, Ўзбекистон ҳудудида фаолият юритиш учун ўрнатилган тартибда лицензияга эга бўлмаган электрон платформалар хизматларидан фойдаланмасликка ва эҳтиёт чораларини кўришларига қатъий даъват этади.
Маълумот учун, Ўзбекистонда илк марта 2018 йилда президент блокчейнни жорий этиш, криптобозор, майнинг, смарт-шартномаларни ривожлантириш — рақамли иқтисодиётни ривожлантириш бўйича чора-тадбирлар тўғрисидаги қарорни имзолаганди.
Кейинчалик, крипто-биржалар фаолиятини лицензиялаш тартиби тўғрисидаги низом Адлия вазирлиги томонидан рўйхатдан ўтказилди. Низомга кўра, крипто-биржалар фаолиятини лицензиялаш Лойиҳа бошқаруви миллий агентлиги томонидан амалга оширилиши белгиланди.
2021 йилда ушбу агентлик томонидан Ўзбекистон фуқароларига крипто-биржаларда крипто-активлар ва токенлар билан крипто-биржа савдоларининг барча турларини миллий ва чет эл валютасида амалга оширишга рухсат беришни кўзда тутувчи лойиҳа муҳоқамага қўйилган эди.
2021 йилнинг ноябрида эса тегишли буйруқ билан Ўзбекистон резидентлари криптоактивлар ва токенлар билан барча турдаги операцияларни миллий валютада (сўмда) амалга ошириш ҳуқуқига эга бўлди.
Жорий йилнинг сентябрь ойида эса Ўзбекистонда крипто-активлар айланмаси соҳасида йиғимлар миқдорибелгиланди. Жумладан, майнинг фаолияти учун — БҲМнинг 10 баравари (3 млн сўм), крипто-биржа фаолияти учун — БҲМнинг 400 баравари (120 млн сўм) крипто-дўкон фаолияти учун — БҲМнинг 20 баравари (6 млн сўм) тўлов қилиш керак бўлади.
31 октябрь куни Адлия вазирлигида крипто-дўкон ташкил этиш ва унинг фаолиятини тартибга солиш қоидалари рўйхатдан ўтказилганди. Унга кўра, крипто-дўкон электрон платформа ва савдо объекти орқали мижозларга хизмат кўрсатиши мумкин бўлади.
