АҚШнинг Тошкентдаги янги элчиси Жонатан Хеник 17 ноябрь куни бўлиб ўтган матбуот анжуманида Ўзбекистондаги хорижий инвесторлар учун тўсиқлар ва имкониятларни санаб ўтди, дея хабар бермоқда «Газета.uz» мухбири.
«Сиз билан очиқ бўламан. Хорижий инвесторлар учун кўплаб тўсиқлар мавжуд. Биринчиси, бу — қонун устуворлиги тизими. Аслини олганда, айрим хорижий компаниялар маҳаллий ҳамкорлар билан келишмовчилик юзага келган тақдирда, қонун доирасида масалалар суд орқали ҳал этилишига ишонч ҳосил қилишлари керак», — деди у.
Бундан ташқари, интеллектуал мулкни ҳимоя қилишни кучайтириш керак, чунки кўплаб хорижий компаниялар ўз брендлари ва маҳсулотларига катта миқдорда сармоя киритдилар. «Афсуски, Ўзбекистонда бундай интеллектуал мулкни ҳимоя қилиш етарли даражада мукаммал эмас», — деди дипломат.
Жонатан Хеник. Фото: Шуҳрат Латипов / «Газета.uz».
Учинчидан, давлат корхоналарининг иқтисодиётда устунлиги ҳам хусусий компаниялар фаолиятини қийинлаштиради. «Мен ушбу давлат компанияларини хусусийлаштиришни кўпроқ истардим», — деди у.
Тўртинчи муаммо — коррупция. «Президент Мирзиёевнинг коррупцияга қарши кураш эълон қилгани ва жиддий саъй-ҳаракатларни амалга оширганини биламан, лекин бу муаммолигича қолмоқда», — деди элчи.
Хорижий компаниялар учун тўсиқ бўлаётган бешинчи муаммо сифатида Жонатан Ҳеник кўплаб товарларга тарифлар юқорилигини кўрсатди.
Дипломатнинг сўзларига кўра, бу Ўзбекистонда ҳаммаси ёмон дегани эмас. «Ўзбекистонда хорижий компаниялар учун жуда жозибали нарсалар кўп. Бу, биринчи навбатда, инсон капитали, инсон ресурслари, бу ерда, Ўзбекистонда жуда катта, ўқиган ва меҳнаткаш ишчи кучи мавжуд. Ўзбекистоннинг ўзи ҳажми жиҳатидан катта бозор, бироқ у кенгайтирилган [Марказий Осиё] бозор учун марказ бўлиш учун ҳам идеал жойлашган», — деди у.
Элчи Ўзбекистон ҳукуматининг позициясини хорижий инвесторлар учун «жуда очиқ ва жозибадор» деб ҳисоблайди.
«Шунинг учун биз кўпроқ хорижий сармояни жалб қилишимиз учун салбийларни камайтириш ва ижобий томонларини таъкидлаш учун биргаликда ишлашимиз керак», — деди Жонатан Хеник.
Йил бошида Стратегик ривожланиш агентлиги Ўзбекистондаги сармоявий муҳитга таъсир этувчи омилларни санаб ўтган эди. Улар орасида иқтисодий ривожланиш, суд-ҳуқуқ тизими, сиёсий барқарорлик, инфратузилмани ривожлантириш ва бошқалар тилга олинди. Агентлик инвестиция муҳитига салбий таъсир кўрсатишига мисол сифатида бизнес учун тез-тез ўзгариб турадиган «ўйин қоидалари», ҳокимларнинг қарама-қарши баёнотлари ва бошқаларни кўрсатди.
