Ўзбекистон тижорат банклари бугунги кунда «Мир» карталарига хизмат кўрсатишда хавфлар кўрмоқда, шу боис ушбу карталарни қабул қилиш масаласи ҳозирча кун тартибида йўқ. Бу ҳақда, Ўзбекистон Марказий банки бошқаруви раиси Мамаризо Нурмуротовга таяниб, «РИА Новости» хабар бермоқда.
«Йўқ. Ҳозирча [хизмат кўрсатишни қайта тиклаш ҳақидаги масала кун тартибида йўқ]», — деди у Самарқанддаги иккинчи халқаро иқтисодий форумнинг норасмий қисмида Ўзбекистонда «Мир» тизими фаолиятини қайта тиклашнинг эҳтимолий муддатлари ҳақидаги саволга жавоб бераркан.
Марказий банк раҳбарининг таъкидлашича, Ўзбекистон банклари ишлаётган тизимда иккиламчи санкциялар бўйича «ҳозир ҳам катта хавфлар мавжуд».
Ягона умумреспублика процессинг маркази (Uzcard бренди) 23 сентябрдан Россиянинг «Мир» тўлов тизими карталарини Ўзбекистонда қабул қилишни тўхтатган эди. Ушбу чеклов Uzcard — «Мир» кобейжинг карталарига тааллуқли эмас, аммо бу карталар Ўзбекистондан ташқарида ишламайди. Бир қатор банкларнинг сайтларида шундай қўшма карталар ҳақидаги бўлимлар олиб ташланган.
АҚШ Молия вазирлигининг иккиламчи санкциялар хавфи ҳақидаги огоҳлантиришидан сўнг Қозоғистон, Арманистон, Туркия ва Вьетнамнинг ҳам бир қатор банклари «Мир» карталарига хизмат кўрсатишни чеклаб қўйган эди.
