Ўзбекистон президенти Шавкат Мирзиёев 5 сентябрь куни асосий озиқ-овқат маҳсулотлари нархи барқарорлигини таъминлаш ва уларнинг захирасини яратиш масалаларига бағишланган йиғилиш ўтказди. Шу билан бирга, йиғилишда ҳудудларда янги мактаблар қуриш масаласига алоҳида тўхталиб ўтди.
«Бугун ҳар бир ҳоким шошилмасдан менга айтади: ички имконият борми ёки йўқми? Агар бор бўлса, нега халққа хиёнат қиляпсан? Нега [ажратилган] пулни ўзлаштирмаяпсан? Нега берган кредитни қила олмаяпсан? Мен бугун ҳаммангдан сўрайман», — дея огоҳлантирди президент.
Унинг қайд этишича, 1 сентябрь ҳолатига кўра 290 та мактабда, жумладан, Андижон вилоятида 25 та, Бухорода 24 та, Жиззахда 12 та, Қашқадарёда 32 та, Навоийда 8 та, Наманган шаҳрида 12 та, Самарқандда 8 та мактабда, Тошкентда — 41, Сирдарёда — 6, Фарғонада — 23, Хоразмда — 6, Тошкентда — 23 та мактабда қурилиш-таъмирлаш ишлари тугалланмаган.
«Бу нимадан далолат? Бугун кўтарилган масалалардан келиб чиқиб, инвестиция дастурини якунлайман. Келгуси йил мактаблар учун бу ҳудудларга пул ажратмайман. Ҳокимни айблаб, телевизорга чиқиб: „Буни қилмаганимга мен айбдорман“, дейишга мажбур қиламан», — деди у.
Шавкат Мирзиёев Сурхондарё вилояти ҳокими Тўра Боболовни 29 та мактабда қурилиш-таъмирлаш ишлари тугалланмагани учун танқид қилди.
«Сурхондарёда прокурорлар билан гаплашадиган ҳоким бор. Прокурор билан телефонда гаплашишдан олдин, мактаблар қуриш масаласини ҳал қилиб қўй. Чарчаган бўлсанг, сени ҳам ишдан оламан», — деди у.
Август ойи ўрталарида тармоқда Тўра Боболов Ангор тумани прокурори Сирожиддин Рамазоновни ҳақорат қилган аудиоси тарқалди. Ҳокимлик ёзувда ҳокимнинг овози борлигини тасдиқлади, бироқ у нотўғри талқин қилинганини билдирди.
«Газета.uz» 2022 йилда давлат 410 млрд сўмга 40 та мактаб қуришни режалаштираётганини ёзганди. Бу аввалги йилга нисбатан қарийб 2 баравар кўп, аммо синфларнинг тўлиб кетиши муаммосини ҳал қилиш учун ҳали ҳам етарли даражада эмас. 235 та мактабни таъмирлаш ишлари тахминан 1,2 трлн сўмга баҳоланди.
