5 август куни 7:00 лар атрофида 4Р-36 Жиззах-Фориш-Қизилча автомобиль йўлининг Фориш тумани ҳудудидан ўтган 46-километрида Isuzu юк машинаси ва Nexia-2 иштирокида ЙТҲ рўй берди. Бу ҳақда Жиззах вилояти ИИБ ахборот хизмати хабар қилди.
Қайд этилишича, Қашқадарё вилояти Китоб туманида туғилган фуқаро бошқарувида бўлган Isuzu юк автомашинаси Жиззах-Фориш йўналишида ҳаракатланиб кетаётиб, ухлаб қолиши натижасида қарама-қарши йўналишда ҳаракатланиб келаётган Фориш туманида яшаган фуқаро бошқарувидаги Nexia-2га бориб урилган.
Натижада енгил автомобиль ҳайдовчиси ва унинг тўрт нафар йўловчиси ҳодиса жойида ҳаётдан кўз юмган.
Эслатиб ўтамиз, жорий йил март ойида Зомин туманида KIA K5 ва Nexia-2 автомашиналари тўқнашиши оқибатида 2 киши воқеа жойида, яна 6 киши шифохонада вафот этган эди.
