Швейцария Федерал жиноий судининг апелляция палатаси Гулнора Каримованинг адвокатлари киритган коррупция айбловлари бўйича шикоятини қисман қаноатлантирди. Мазкур суд қарори унга музлатиб қўйилган 293 млн франк (303 млн доллар) маблағни қайтариб олишга ёрдам бериши мумкин, деб ёзмоқда Bloomberg Law.

Швейцария прокурорлари 2012 йилдан бери Гулнора Каримова ва ўзбек бозорига кириш учун гўёки унга пул тўлаган мобил алоқа операторлари билан боғлиқ коррупция можаросини тергов қилмоқда. Гулнара Каримова учта телекоммуникация — МТС и VimpelCom (ҳозир — Veon, бренд Beeline) ва TeliaSonera (ҳозир — Telia Company, илгари Ucell савдо белгисига эгалик қилган) компанияларидан пора тариқасида олинган 865 млн АҚШ доллари миқдоридан ортиқ коррупциявий схемаларда иштирок этганликда ва пул ювишда айбланмоқда.

Bloomberg Law, маълумотларига кўра, Швейцариянинг биринчи инстанция суди Гулнора Каримова Ўзбекистоннинг биринчи президенти Ислом Каримовнинг қизи сифатида, де-факто Ўзбекистон телекоммуникация бозорида катта таъсир доирасига эга давлат хизматчиси мақомига эга бўлган. «Давлат хизматчисининг ролини бундай кенг талқин қилишга йўл қўйиб бўлмайди», — дейилади апелляция палатаси қарорида.

Бу қарор Каримовага қарши терговда туб бурилиш ҳисобланади, дея таъкидлашди унинг адвокатлари Грегуар Манжа ва Фанни Маргайраз жума куни кечқурун Keystone-SDA агентлигига берган интервьюсида. Шу тарзда Федерал прокуратура асосланган айбловлар шубҳа остига олинди.

Ҳимоячилар шунингдек, Швейцария прокуратурасининг айблов стратегиясини ҳам танқид қилди. Апелляция палатаси қўшимча иш юритиш доирасида Каримованинг маблағларини мусодара қилиш айбсизлик презумпциясини бузганлигини ва асосий тергов ҳали ҳам давом этаётганини аниқлади.

Грегуар Манжа Twitter`да «293 млн франкнинг мусодараси бекор қилинганини» ёзиб қолдирди.

Агентлик қайд этишича, суд қарори Каримовага ўзининг музлатиб қўйилган маблағларининг бир қисмини қайтариб олишга ёрдам беради. Гап 293 млн Швейцария франки ($303 млн) ҳақида кетмоқда. Бу Ўзбекистон мамлакатга қайтармоқчи бўлган хорижий активлар миқдорининг чорак қисмидан сал кўпроғини ташкил этади.

Эслатиб ўтамиз, 2019 йил 18 мартда Тошкент шаҳар суди ҳукми билан Гулнора Каримовага 13 йил 4 ой муддатга озодликдан маҳрум қилиш жазоси тайинланди. Жазо муддатини 2015 йил 21 августдан бошлаб ҳисоблаш белгиланган эди.

2019 йил март ойида АҚШ Гулнора Каримова ва «Ўздунробита»нинг собиқ бош директори Беҳзод Аҳмедовни коррупция ва 865 млн доллардан кўпроқ пулни «ювган"ликда айблаган эди. 24 июнда эса Швейцария Бош прокуратураси Каримова иши бўйича музлатилган 130 млн швейцар кронаси [$133,7 млн] миқдоридаги маблағни Ўзбекистонга қайтаришини маълум қилган эди.

2020 йилнинг май ойига келиб, Каримованинг 10 млн долларлик активи Франциядан қайтарилган. Сентябрга келиб, Швейцария ҳукумати мусодара қилинган пул маблағларини Ўзбекистонга қайтариш шартлари бўйича мамлакат ҳукуматлари келишувга эришганини маълум қилди. Ўшанда Каримованинг Швейцариядаги ҳисобларидан олинган 131 млн долларлик маблағ Ўзбекистонга қайтарилиши айтилганди.

Аввалроқ, «Газета.uz» ижтимоий тармоқларда Каримованинг соғлиги оғирлашганига оид тарқалган хабарларга ойдинлик киритиш мақсадида ИИВ Жазони ижро этиш бош бошқармаси билан боғланган эди. «Унинг аҳволи яхши, COVID-19`га чалинмаган, ўпка пневмонияси ҳам йўқ», — дейилганди хабарда.

Қолаверса, 2022 йилнинг 30 июнида Канаданинг The Globe and Mail нашри Гулнора Каримовага тегишли экани тахмин қилинаётган ҳашаматли кўчмас мулк у қамоқдалик вақтида 68,4 млн долларга қайта сотилган бўлиши мумкин, дея хабар берганди.