15 июлдан бошлаб Ўзбекистон мамлакат корхоналарида ишлаб чиқарилган автобензин ва дизель ёқилғисини экспорт қилишни вақтинча чеклади. Бу Вазирлар Маҳкамаси йғилишининг 16 июлда тасдиқланган протоколида назарда тутилган. Бу ҳақда «Газета.uz»га ҳукуматдаги ҳамда нефтгаз соҳасидаги иккита манбаси маълум қилди.
Хабар қилинишича, охирги ойда 15−16,5 минг тонна атрофида бензин экспорт қилинган, «бу мамлакатнинг ёқилғига бўлган 5−6 кунлик эҳтиёжи дегани».
Экспорт чекловидан сўнг, биржа савдосига қўйиладиган бензин ҳажми оширилди, бу «нархларнинг пасайишига олиб келиши керак», дея таъкидлади манба.
Шу билан бирга, ҳукумат ёқилғини импорт қилишга чеклов ўрнатмади.
«Газета.uz» Ўзбекистонда дизель ёнилғисининг биржа нархлари йил бошидан буён деярли 50 фоизга — 10,82 млн сўмдан 16,14 млн сўмгача ошганини маълум қилганди.
«Ўзбекнефтгаз» нарх кўтарилишини Brent маркали нефтнинг юқори котировкалари ва мамлакатга импорт нефт маҳсулотларини олиб киришдаги вақтинчалик қийинчиликлар билан изоҳлади.
Шунингдек, энг оммабоп бўлган Аи-80 бензини январдан бери биржада 10,9 фоизга — 8,1 млн сўмдан 8,99 млн сўмгача ошгани ҳақида ҳам ёзгандик. Шунга қарамасдан, Ўзбекнефтгаз»га қарашли Тошкент ва вилоятлардаги ёқилғи қуйиш шохобчаларида ушбу маркадаги бензин бир литри учун 6800 сўмдан, хусусий АЁҚШларида эса 7000 сўмдан 7700 сўмгача (ёки ундан ҳам қимматроқ — 7200 сўмдан 8600 сўмгача) сотилмоқда. Компания буни импорт қилувчилар томонидан юқори октанли автобензиннинг четдан келтириши камайиши натижасида Аи-80 русумли автобензинга бўлган талаб ортиб бораётгани билан изоҳлаганди.
