3 июлдан бери фавқулодда ҳолат жорий этилган Қорақалпоғистонда тахминан соат 13:45 лар атрофида интернет яна ишлай бошлади. Бу ҳақда «Газета.uz»га Нукус аҳолиси хабар берди.
Telegram-каналларда cўнгги икки ҳафта ичида илк бор хабарлар пайдо бўла бошлади. Сайтлар ҳам яна янгилана бошлади.
Ҳозирча бу интернетнинг вақтинча ёқилишими ёки энди у доимий равишда ишлайдими номаълум. Расмий муносабат билдирилмади. «Газета.uz» интернетга кириш имконини яратиб берувчи давлат органлари ва компанияларга сўров юборди.
5 июль куни эълон қилган репортажимизда интернет ўчирилиши Қорақалпоғистон аҳолиси ҳаётига қандай таъсир кўрсатаётгани ҳақида ёзгандик.
Ўша куниёқ БМТ Инсон ҳуқуқлари бўйича Олий комиссари Мишель Бачелет Ўзбекистон ҳукуматини интернет чекловларини бекор қилишга чақирди ва «ушбу чора танлаб бўлмайдиган характерга эга эканлигини ва бошқа ҳуқуқлар қаторида сўз эркинлиги ва маълумотдан фойдаланиш каби базавий ҳуқуқларга кенг таъсир қилишини» таъкидлади.
6 июль куни Ўзбекистон ТИВ Қорақалпоғистонда уяли алоқа ва интернет «сохта янгиликларни тарқатиб, душман кайфиятдаги кучлар фуқароларни аксилконституциявий фаолиятга оммавий равишда жалб қилишга уринганлари» сабабли чекланганини маълум қилди.
