БМТ Инсон ҳуқуқлари бўйича Олий комиссари Мишель Бачелет Ўзбекистон расмийлари хабар берган Нукусдаги намойишлар пайтида камида 18 кишининг вафот этганини «оператив тарзда, мустақил ва шаффоф тергов қилиш»га чақирди. Унинг баёноти 5 июль куни эълон қилинган.

Вафот этганлар шахси ҳозирги вақтда аниқ эмаслигини таъкидлаган ҳолда, комиссар манбани келтирмасдан ҳалок бўлганлар ўқдан яралангани ҳақидаги маълумотларни келтирди. Шунингдек, у ҳалок бўлганлар сони кўпроқ бўлиши мумкинлиги тўғрисида хавотир билдирди.

4 июль куни Миллий гвардия 1 ва 2 июл кунги намойишлар вақтида 243 киши жабр кўрганлигини, улардан 94 нафари шифохонада қолаётганлигини маълум қилди. Ҳалок бўлган 18 кишидан 13 нафари алкоголь ёки наркотик модда таъсири остида бўлгани айтилди. Вафот этганларнинг тўрт нафари ҳарбий хизматчилар бўлган, дея аниқлик киритиди 5 июль куни Миллий гвардия.

Мишель Бачелет намойишлар пайтида зўравонлик бўлгани ҳақидаги хабарларни «хавотирли» деб атади ва расмийларни «очиқликни таъминлаш учун зудлик билан ноқонуний ҳаракатлар бўйича ҳар қандай баёнотларни шаффоф ва мустақил тергов қилишни бошлашга» чақирди.

«Инсонлар ўз ҳуқуқларини амалга оширганликлари учун жиноий таъқибга учрамасликлари керак, — дея таъкидлади Мишель Бачелет. — Ўзбекистон аъзо-давлат ҳисобланадиган Фуқаролик ва сиёсий ҳуқуқлар тўғрисидаги халқаро пактга биноан, ҳар бир киши сўз эркинлиги, тинч йўл билан йиғилиш ва жамоатчилик фаолиятида иштирок этиш ҳуқуқига эга».

У қўлга олинган барча шахслар зудлик билан адвокатга мурожаат қилиш имконияти ҳамда уларга нисбатан тегишли ҳуқуқий тартиб ва адолатли суд кўриб чиқиши билан таъминланиши кераклигини қўшимча қилди.

Мишель Бачелет ҳукуматни интернетга чекловларни бекор қилишга чақирди. У «ушбу чора танлаб бўлмайдиган характерга эга эканлигини ва бошқа ҳуқуқлар қаторида сўз эркинлиги ва маълумотдан фойдаланиш каби базавий ҳуқуқларга кенг таъсир қилишини» таъкидлади.