IT-Park ҳамда Ахборот технологиялари ва коммуникацияларини ривожлантириш вазирлиги биргаликда халқаро IT сертификатларини олган ёшларга харажатларнинг ярми қайтариб берилиши бўйича дастур ишлаб чиқди. АОКАда ўтган брифингда IT Park бўлим бошлиғи Жамила Халибаева бунинг тартибини тушунтирди.
Дастурга кўра, халқаро IT-сертификатларини олган 14 ёшдан 30 ёшгача бўлган Ўзбекистон фуқаролари сарфланган маблағнинг 50 фоизигача компенсация пулини қўлга киритиши мумкин.
Компенсация олиш учун аризалар онлайн тарзда my.gov.uz портали орқали юборилади.
Аризага қуйидаги ҳужжатларни илова қилиш лозим:
- ўқиш ва халқаро сертификат олиш учун харажатлар квитанцияси;
- халқаро IT-сертификатининг нусхаси.
Компенсация олиш учун сертификат олгандан бошлаб 180 кундан кечиктирмасдан мурожаат қилиш лозим. Пулни ўтказиш учун банк карта рақами, банк транзит рақами, СТИР ва банк коди зарур бўлади. Ариза берувчи 16 ёшга тўлмаган бўлса, аризани тўлдиришда ота-она/васийларнинг маълумотларини кўрсатиш лозим.
Агар ариза берувчининг сўровномадаги реквизитлари ва унга илова қилинган ҳужжатлар белгиланган талабларга жавоб берса, компенсация ариза тўлдирилган кундан бошлаб 17 иш куни ичида берилади.
Компенсация бериладиган халқаро IT-сертификатларининг тўлиқ рўйхати it-istedod.uz сайтида жойлаштирилган.
Маълум қилинишича, компенсация миқдори олинган сертификатнинг IТ-мутахассислик даражасига қараб ҳисобланади. Хусусан, бошланғич даражадаги сертификатлар учун 30%, ўртача даража учун 40% ва юқори даражадаги IТ-мутахассислик сертификатига 50% компенсация тўлаб берилади.
Масалан, Cisco компаниясидан CyberOps профессионал курсининг нархи 3000−6000 долларгача бўлади. Шундай қилиб, курсни муваффақиятли тамомлаган ёшлар 3000 долларгача компенсация пулини олиш имкониятига эга, дейилади хабарда.
Ушбу халқаро IТ-сертификатларни олиш учун онлайн ва оффлайн тарзда курсларни битириш мумкин. Онлайн курсларни HUAWEI, Coursera, Skillbox, Geekbrains каби платформаларда, офлайн таълимни эса IТ-Park Тошкент филиалида ҳамда пойтахтда жойлашган бир қатор хусусий ўқув марказларида олиш мумкин.
