Самарқанд вилоятида 2000 туп марихуана етиштирган фуқаро аниқланди, дея хабар берди Самарқанд вилояти ИИБ матбуот хизмати.
ДХХ Самарқанд вилояти бошқармаси вилоят ИИБ билан Пастдарғом туманининг Жума шаҳрида жойлашган цемент сақлаш учун мўлжалланган омборхонада тахминан 3−4 сотих ер майдонида яширин равишда 2000 туп марихуана гиёҳвандлик ўсимлиги етиштирилаётгани ҳақидаги мурожаатга асосланиб тезкор тадбир ўтказган.
Унда ушбу омборхонада ҳақиқатда марихуана экилганлиги, гиёҳвандлик ўсимлигини 46 ёшли фуқаро экканлиги ва уларни 38 ҳамда 30 ёшли эркаклар парваришлаб келаётгани маълум бўлган. Бу икки нафар эркак тезкор тадбир ўтказилишидан хабар топгач, омборхонага ўт қўйиб юборишган. Ёнғин ўчирилган, лекин 2000 туп марихуанадан 1400 га яқини ёниб кетган. Тадбир жараёнида эса 610 туп марихуана гиёҳвандлик ўсимлиги тегишли тартибда ҳужжатлаштириб олинган.
Ҳозирда уч нафар шахсга нисбатан Жиноят кодексининг 273-моддаси 5-қисми (гиёҳвандлик воситалари, уларнинг аналоглари ёки психотроп моддаларни кўп миқдорда қонунга хилоф равишда сотиш) билан жиноят иши қўзғатилган ва улар процессуал тартибда қўлга олинган.
