2022 йил 1 июлдан ҳар йили 1 миллион нафаргача аҳоли вирусли гепатит Б ва C турларига скрининг текширувларидан ўтказилади. Бу президентнинг 16 майдаги «Айрим долзарб вирусли инфекциялар тарқалишига қарши курашиш чора-тадбирларини такомиллаштириш тўғрисида»ги қарорида қайд этилган.
Шунингдек, мазкур санадан бошлаб полимераза занжир реакцияси (ПЗР) текширувлари сони 15 минг нафаргача, вирусли гепатит C тури билан касалланган беморларни даволашни 10,5 минг нафаргача етказилади.
2022 йил 1 сентябрдан Маъмурий жавобгарлик тўғрисидаги кодекснинг 190-моддасида (Фоҳишалик билан шуғулланиш) назарда тутилган ҳуқуқбузарликларни содир этган шахсларга нисбатан жавобгарликни белгилаш билан бирга уларни ўз ҳисобидан гепатитнинг Б ва C турларига скрининг текширувларидан ўтказиш тартиби жорий этилади.
2022 йил 1 июлдан нодавлат тиббиёт ташкилотлари қон ва унинг таркибий қисмлари билан ишлаётган ўз ходимларини гепатит Б инфекциясига қарши эмлашни, шунингдек, Реестр ишга тушган пайтдан бошлаб бу ҳақдаги маълумотнинг Реестрга киритиб борилишини таъминлаши керак. Бунда, эмланмаган ходимларни эмлаш уларнинг асосий иш жойи бўлган тиббиёт ташкилотлари ҳисобидан амалга оширилади. 2024 йил 1 январдан мазкур талаб тиббий фаолиятни лицензиялаш талаблари ва шартларидан бири ҳисобланади.
2022 йил 1 ноябрга қадар ССВ муассислигида «IT-Med» МЧЖ томонидан жигар сурункали вирусли касалликларининг ягона электрон реестри ишлаб чиқилади, шунингдек, келгусида унинг техник ва дастурий қўллаб-қувватланишини таъминланади.
2023 йил 1 январга қадар реестрни юритишни қон ва унинг таркибий қисмлари билан ишлайдиган ходимларга эга бўлган даволаш-профилактика муассасалари, санитария-эпидемиология хизмати ҳамда мулкчилик шаклидан қатъи назар барча тиббиёт ташкилотларига жорий қилиб, уларнинг ўзаро интеграциясини йўлга қўйилади.
Даволаш-профилактика муассасалари ва нодавлат тиббиёт ташкилотларида юқумли касалликларга, шу жумладан, сурункали вирусли гепатитларга ташхис қўйиш ва уларни даволаш стандартларини такомиллаштирилади ҳамда уларга риоя қилиниши устидан назорат кучайтирилади.
