14 апрель куни Сенатда Халқаро рейтинг ва индекслар билан ишлаш бўйича республика кенгашининг навбатдаги йиғилиши ўтказилди. Бу ҳақда «Газета.uz»га Сенат матбуот хизмати хабар берди.
Таъкидланишича, «Heritage» (Мерос) жамғармасининг (АҚШ) Иқтисодий эркинлик индексида Ўзбекистон 177 та давлат орасида 117-ўринни эгаллаган. Бу кўрсаткич 2021 йилга нисбатан яна 9 пағонага пасайган ва мамлакат иқтисодиёти «асосан эркин бўлмаган мамлакатлар» гуруҳида қолди.
Сенат раиси Танзила Нарбаева бу ўринда индекснинг «Эркин савдо» кўрсаткичида Ўзбекистоннинг ўрни рекорд даражада яхшиланганини этироф этди.
«Ушбу индикаторда мамлакат АҚШ, Япония, Хитой ва Россия сингари ривожланган давлатларни ортда қолдириб, 2021 йилдаги 163 ўриндан 67-ўринга кўтарилди ва Марказий Осиё давлатлари орасида етакчиликни қўлга киритди», — деди у.
Бундан ташқари инвестиция, молиявий эркинлик ва монетар эркинлик кўрсаткичларида сезиларли ўсиш қайд этилди.
«Бироқ, Индекснинг айрим кўрсаткичларида самарадорликнинг энг муҳим кўрсаткичлари — KPI`га эриша олмадик. Энг ёмон кўрсаткич Олий суд масъул бўлган „Суд фаолияти самарадорлиги“ йўналиши бўлди. амалдаги 50,8 баллдан 13,1 баллга (-37,7) пастлаган», — деди юқори палата раиси.
Унинг сўзларига кўра, молия вазирлиги масъул бўлган «Солиқ юки»" ва «Фискал саломатлик» кўрсаткичларида ҳам Ўзбекистон жамғарган баллар пасайганлиги ҳисобига KPI`га эришилмади.
Иқтисодий тараққиёт вазирлиги масъул бўлган «Бизнес эркинлиги» кўрсаткичида ҳам мамлакат ўрни 14,4 баллга пасайиб, KPI`га етиб бормади.
«Бандлик вазирлиги масъул бўлган „Меҳнат бозори эркинлиги“ индексида ҳам KPI`га эриша олмадик. Кўриб турганимиздек, KPI`га эришиш бўйича ишларимиз қониқарли даражада эмас», — деди Танзила Нарбаева.
Шунга қарамасдан, Ўзбекистон бошқа халқаро рейтингларда, жумладан, 2021 йилда 19 та халқаро рейтингдан 11 тасида ўз позицияси яхшиланган.
Хусусан, Суверен кредит рейтингларида ижобий тенденциялар кузатилиб, «S&P» халқаро рейтинг агентлиги мамлакат кредит рейтингини «салбий»дан «барқарор»га, Moody’s агентлиги эса «барқарор»дан «ижобий»га ўзгартирди.
Глобал инновациялар индексида Ўзбекистон 2021 йилда 7 поғонага кўтарилиб, 132 та давлат орасида 86-ўринни эгаллади ва энг тез юқорилаган мамлакатлар топ 10 талигига кирди.
