Буюк Британия бош вазири Борис Жонсон 2020 йил июнь ойида карантин қоидаларини бузганлиги учун жарима тўлади. Бу ҳақда BBC хабар берди.
Жарима 2020 йил 19 июнь куни Даунинг кўчасида бош вазирнинг туғилган куни шарафига бўлиб ўтган тадбир сабабли чиқарилди. Жарима миқдори қанча бўлганлигига аниқлик киритилмаган, дея ёзмоқда РБК.
Борис Жонсон Буюк Британия тарихида қонунни бузганлиги учун жаримага тортилган амалдаги биринчи бош вазирга айланди.
Жонсон ушбу базмни ўтказганлиги учун кечирим сўраган. «Фуқароларни ҳимоя қилиш учун мен томонимдан бошқариладиган ҳукуматнинг киритган қоидаларига ўзим риоя қилмаганлигим учун кўпчиликнинг норозилик туйғуларини тушуниб турибман», — деди у.
Ўша кун ҳақида гапирар экан, Жонсон «бу қоидаларни бузиши ҳаёлига ҳам келмаганлигини» таъкидлади. Бош вазирнинг сўзларига кўра, Даунинг кўчасидаги «қисқа йиғилиш» ўн дақиқадан кўпроққа чўзилмаган. Шу билан бирга, полиция ушбу тадбир коронавирусга қарши қоидаларни бузганлигини аниқлаган ва Жонсон «тергов натижаларини тўлиқ ҳурмат қилишини» билдирган.
Бош вазирдан ташқари ғазначилик канцлери Риши Сунак ва бош вазирнинг рафиқасига ҳам карантин чораларини бузганлиги учун жаримага тортилди. Бош вазирнинг рафиқаси Керри Жонсоннинг матбуот котиби у полиция хулосаларини қабул қилганини ва «сўзсиз кечирим сўрашини» айтди. Канцлер Сунак қарорни ҳурмат қилиб, жаримани тўлаганлигини маълум қилган.
BBC маълумотларига кўра, Жонсон билан боғлиқ тадбирларда карантин қоидаларининг бузилганлиги сабабли жами 50 дан ортиқ жарималар ёзилган. Жумладан, шундай тадбирлардан бири, 2020 йил охирида мамлакатда қатъий карантин чекловлари амал қилиб турган вақтда бўлиб ўтган Рождество базми Буюк Британия жамоатчилиги орасида катта норозиликларга сабаб бўлди. Унда Бош вазир кануелярияси ходимлари иштирок этган, Жонсоннинг ўзи эса тадбирда қатнашмаган ва бу бўйича текширув ўтказишини билдирган.
Британия жамоатчилиги, мухолифат партиялар ушбу қоидабузарлик ортидан канцлер ва бош вазирни ўз лавозимини тарк этишга чақирди, бироқ улар буни рад этишди.
