Ўзбекистонлик 46 ёшли спортчи Оксана Чусовитина Дохада (Қатар) ўтказилган спорт гимнастикаси бўйича Жаҳон кубогининг лицензион босқичида олтин медални қўлга киритди, деб хабар берди Миллий олимпия қўмитаси матбуот хизмати.
Фото: FIG.
Таяниб сакраш дастурида у 13433 балл тўплашга муваффақ бўлди. Оксана Чусовитина 2021 йили Дохада ўтказилган Жаҳон кубогида ҳам худди шунча очко тўплаб, олтин медални қўлга киритган эди.
Иккинчи ўринни 13.150 очко билан венгриялик Мария Баскай эгаллаган бўлса, бронза медали 13.133 балл тўплаган россиялик Виктория Листуновага насиб этди.
25 июль куни Оксана Чусовитина Токиода бўлиб ўтган ёзги Олимпия ўйинларида саккизинчи бор иштирок этиб, рекорд қайд этган ва каръерасини якунлашини маълум қилган эди. У ушбу режасини 2019 йил октябрдаёқ маълум қилган эди. Бироқ сентябрь охирида у спортга қайтишини маълум қилди. У келаси йил ўтказиладиган Осиё ўйинларида қатнашиш ниятидалигини билдириб, «Мен, шунчаки, фаолиятимни Ўзбекистон учун медалсиз якунлай олмайман», — деди.
Оксана Чусовитина 1975 йил 19 июнь куни Бухоро шаҳрида туғилган. Успорт билан шуғулланишни 8 ёшида бошлаган. Узоқ йиллар давомида Светлана Кузнецова қўл остида спорт гимнастикасини ўрганиб келган. 1990 йил терма жамоа аъзосига айланган. Оксана Чусовитина спорт гимнастикаси бўйича Олимпия ўйинларида энг кўп иштирок этган спортчи (1992, 1996, 2000, 2004, 2008, 2012, 2016, 2020) ҳисобланади. 1992 йил Барселонада ўтган Олимпия ўйинлари олтин медали соҳиби, 3 карра Жаҳон чемпиони.
