18 февраль куни тонгги соат 03:30 да Тошкент шаҳар Сергели туманида жойлашган юк автомобиллари ва эҳтиёт қисмларини сотиш дўконида ёнғин келиб чиқди. ФВВ бу ҳақда туман ФВ бўлимига хабар келиб тушганини маълум қилди.
Воқеа «Бунётобод» МФЙ «Янги Сергели» кўчасида содир бўлган ва у ерга 7 та ёнғин-қутқарув экипажи соат 03:36 да етиб бориб, ёнғинни 2 дақиқа ичида қуршаб олган. Соат 04:10 да ёнғин бартараф этилган.
Маълум бўлишича, ҳодиса натижасида дўконнинг 900 кв.м майдонида ички шифт қисми ва ташқи алюкобонд қопламаси ёниб кетган. Ҳеч ким тан жароҳати олмаган ва ҳалок бўлмаганлиги айтилди.
Ҳозирда ёнғиннинг келиб чиқиш сабаби ва моддий зарар миқдори аниқланаётгани маълум қилинди.
