Президент Шавкат Мирзиёев Ўзбекистон фуқаролари олдиндан пул тўлаб қўйиб, автомобилни ололмаётгани ҳақида гапирди. Унинг бу сўзлари «Ўзбекистон24» телеканалида намойиш этилган Хайрулла Нуриддиновнинг «Менимча» кўрсатувида намойиш этилди.
«Одамлар норози, биз тўлаб қўйганмиз, машинани бер эй давлат раҳбарлари, деяпти. Худога шукр, иқтисодиётимиз ривожланяпти, одамларнинг машинага талаби ошиб боряпти. Лекин шу билан бирга биз йўл ҳаракат хавфсизлигини таъминлаш бўйича албатта, мутлақо бошқа чораларни кўришимиз керак», — деди президент.
Шундан келиб чиқиб, давлат раҳбари келгуси ҳафта автомобилсозлик масалалари кўрилишини маълум қилди.
Эслатиб ўтамиз, UzAuto Motors 20 декабрь куни 1 февралга қадар Nexia, Spark, Cobalt ва Lacetti автомобилларига аризалар қабул қилишни тўхтатганди. Компания бу вақт ичида аввалги буюртмалар етказиб берилишини маълум қилиб, харидорлардан ноқулайликлар учун узр сўраган.
Кўрсатилган муддатда эса Nexia, Spark, Cobalt ва Lacetti автомобилларига аризалар қабул қилиш қайта тикланмади. «Газета.uz»нинг автомобиль саноатидаги манбаси маълумотларига кўра, автомобиль ишлаб чиқарувчи 25 январь куни кузатилган кенг қамровли электр энергиясидаги узилишлардан сўнг, муаммоларга дуч келган. Электр узилишлари газ таъминоти билан боғлиқ муаммоларга олиб келган, бу эса компонентларни ишлаб чиқарувчи корхоналарнинг тизимли ишига ҳам таъсир кўрсатган.
Бундан ташқари, шу кунларда депутат Расул Кушербаев «Газета.uz»га берган интервьюсида UzAuto Motors автомобиллари учун 85 фоизлик олдиндан тўлов миқдорини пасайтириш бўйича ҳукуматга таклифлар тайёрланаётганини маълум қилганди.
Депутат олдиндан тўлов кўпи билан 50% бўлиши кераклигини таъкидлади. «Ҳали кўрсатилмаган хизмат ва харид қилинмаган товар учун олдиндан тўлов қилиниши мантиқсиз ўзи», — деди у.
