UzAuto Motors ўзининг Nexia, Spark, Cobalt ва Lacetti автомобиллари учун шартномаларни қабул қилишни қайта тикламади, холбуки компания 1 февралдан шартномалар тузишни режалаштирганди.

«Газета.uz»нинг автомобиль саноатидаги манбаси маълумотларига кўра, автомобиль ишлаб чиқарувчи 25 январь куни кузатилган кенг қамровли электр энергиясидаги узилишлардан сўнг, муаммоларга дуч келган. Электр узилишлари газ таъминоти билан боғлиқ муаммоларга олиб келди, бу эса компонентларни ишлаб чиқарувчи корхоналарнинг тизимли ишига ҳам таъсир кўрсатди.

Бунинг яна бир сабаби харидорлар ва олиб сотарларнинг навбати узунлиги айтилмоқда. UzAuto Motors мижозларининг маълумотлари базасига мувофиқ, 2021 йилда келгусидаги харидлар учун олдиндан 40 мингдан ортиқ шартнома тузилган.

2020 йилда ишлаб чиқариш ҳажми йилига 280 минг автомобилни ташкил этган, харид учун аризалар сони эса 240 минг атрофида бўлган. Бироқ, 2021 йил декабрь ойининг ўрталарида тўловга лаёқатли талаб 325 мингдан ошиб кетди — йил бошидан янги автомобиллар учун айнан шунча ариза рўйхатга олинган, бу пайтда эса ишлаб чиқариш ҳажми 236,6 мингни ташкил қилди.

Олиб сотарлар туфайли ортиқча талаб ва коррупциявий элементлар пайдо бўлмоқда. Шу сабабли ҳам компания «янги автомобилларни қайта сотилишининг олдини олиш учун вақтинчалик чоралар кўришга» мажбур, дея таъкидлади манба.

UzAuto Motors айнан қачондан бошлаб аризаларни қабул қилишни бошлаши ҳозирча номаълум.

20 декабрь куни компания дунёда яримўтказгичлар ва логистик муаммолар туфайли Nexia, Spark, Cobalt ва Lacetti автомобилларини сотиш бўйича янги аризалар қабул қилишни тўхтатганди. Бу вақт ичида компания «аввал берилган буюртмалар бўйича автомобилларни ишлаб чиқаришни ўзининг устувор вазифаси» деб ҳисоблашини маълум қилганди.

Давлат статистика қўмитасининг маълумотларига кўра, 2021 йилда UzAuto Motors 236,6 минг автомобиль ишлаб чиқарди, бу 2020 йилга қараганда 43,4 мингга (15,5%) камроқ. Биргина ўтган йилда 71082 та Cobalt (-11%), 31466 та — Nexia (+52,6%), 51061 та — Gentra (+2%), 55068 та — Damas (+6,5%), 9915 та — Spark (-56,9%) ва 17308 та — Labo (+91,8%) ишлаб чиқарилган.

Хорижга 281,8 млн долларлик 28952 та автомобиль экспорт қилинган, бу бир йил аввалга қараганда 10,4 минг мошинага кўпроқ демакдир.