Адлия вазири Русланбек Давлетов TikTok платформасини блоклаш бўйича билдирилган таклифлар ҳақида гапириб, у ахборотнинг эркин тарқалиши тарафдори эканини таъкидлади. Бу ҳақда вазир жамоатчиликка берган анъанавий йиллик ҳисоботи давомида айтиб ўтган.
«Менинг ўзим ҳам „Адолат“ партияси аъзосиман. Бизнинг партиядошларнинг фикрини билмадим, лекин мен ахборотнинг эркин тарқалиши тарафдориман. Чунки, тарихда ҳам жуда кўп бўлган ахборотни чеклаш. Ҳозир мана „блоклаш“ дегани нима ўзи? Техник нуқтаи назардан бунинг имконияти борми? Уни блоклаб қўйдингиз дейлик, буёқдан ҳамма VPN`га ўтади-ку, шундай зўр текин [турлари] бор. Янги-янги дастурлар чиқади. Жаҳолат бўладиган бўлса, унга қарши маърифат билан курашишимиз керак», — дейди адлия вазири.
Русланбек Давлетов ёмон контент фақат TikTok`да учрамаслигини қайд этди.
«TikTok`дан бошқа жойда ёмон контент йўқми, интернетга кирсангиз, бошқа бўлмағур сайтлар йўқми? Қаердан бўлмаса диний экстремизм кучайяпти, қаердан пропаганда бўляпти? Ахборотни блоклаш техник нуқтаи назардан жуда қийин масала. Шунинг учун, ўйлайманки, бу самара бермайди», — дея қўшимча қилди вазир.
Аввалроқ, «Адолат» партияси Ўзбекистонда TikTok тармоғини бутунлай блоклашни таклиф қилиб, буни тармоқдаги видеолар орасида ўзгалар ҳаётига дахл қилувчи номақбул кадрлар кўпаяётганлиги билан изоҳлаганди.
«Ўзбекистон 24» телеканали директори Хайрулла Нуриддинов ўзининг «Менимча» кўрсатувида «агар TikTok ёмон бўлса, келинг, уни яхши қилайлик», дея фикр билдирганди.
Комил Алламжонов ТikTok компанияси вице-президенти Тео Бертрамга тармоқни Ўзбекистон қадриятлари ва менталитетига мослаш таклифини билдирганди.
