Ўзбекистонлик профессионал боксчи Шоҳжаҳон Эргашев (21−0, 19 КО) фаолиятини якунлаганини маълум қилди. Бу ҳақда у 24 январь куни Instagram-саҳифасида ёзди.
«Узоқ вақт уйда бўлмадим ва отам мендан уйга келишимни сўради. Отам билан жуда ҳам кўп суҳбатлашдик, оз бўлса ҳам босиб отган йўлларимизни ёдга олдик. Мен 29 ёшдаман ва бугун биринчи маротаба отам спортдаги фаолиятимни якунлашимни сўради. Ҳамма нарсанинг боши ва охири бўлганидай, спорт ҳам абадий эмас», — дея маълум қилди 29 ёшли спортчи.
Шоҳжаҳон Эргашев «ўз ҳаётининг янги саҳифасини очаётганини» маълум қилди.
«Боксни буткул ташламайман ва бир куни яна рингда бўлсам, фақатгина ўзим учун рингда бўламан. Ўзимни янги соҳада синаб кўраман,аммо бу спорт соҳаси эмас», — деб ёзди у.
Шоҳжаҳон Эргашев охирги марта 12 декабрь куни рингга чиқиб, 40 ёшли таиландлик Аеккауе Кауманени биринчи раунддаёқ нокаутга учратган эди. Бокс кечасини Шоҳжаҳон Эргашевнинг ўзи ташкил қилди. Wrestlingua нашри промоутер Дмитрий Салита (Salita Boxing) билан можаро туфайли боксчининг ўзи бундай шоуларни ўтказишга мажбур бўлганини тахмин қилди.
Можаронинг мавжудлигини спортчининг ўзи Instagram`даги пости билан тасдиқлаган эди.
«Salita_promotions, бўлар энди, келинг тезлашайлик ва ўз қобилиятларимни бутун дунёга кўрсатишим учун келишиб олайлик. Ишончим комилки, сиз менинг салоҳиятимни биласиз. Отам мендан борган сари Чемпионлик камарини тезлаштиришимни талаб қилмоқда. Биласизми, отамнинг сўзи қонун, унинг тилаклари менинг устуворлигимдир. Хўш, келишамизми?» — деб ёзди у 18 январь куни.
Фото: shohjahonergashev_official / Instagram.
Ўтган йилнинг сентябрида эса Шоҳжаҳон Эргашев Санкт-Петербургда (Россия) «Нокаут қироллари V: Ғазаб мушти» шоусининг бош тадбирида чиқиш қилиши керак эди. Дмитрий Салита истиқболли жанглар учун эксклюзив ҳуқуқларга эга эканлигини таъкидлади, аммо у Санкт-Петербургдаги жанг ҳақида ҳеч нарса билмаган. Шу сабабли, промоутер дарҳол судга мурожаат қилди ва боксчига Россиядаги шоуда қатнашиш тақиқлашга эришди.
Промоутернинг маълум қилишича, у ноябрда NBC телеканалидаги янги Ring City шоусида боксчининг иштироки бўйича музокаралар олиб борган. Айнан шу сабабдан у зудлик билан боксчи ва унинг менежери Олег Богданов томонидан шартнома шартларининг бузилишига муносабат билдирган.
Шоҳжаҳон Эргашев ўзининг профессионал карьераси давомида 21 та жанг ўтказиб, уларнинг барчасида ғалаба қозонди, 19 та жангни эса нокаут билан якунлади. 2021 йил декабри ҳолатига кўра, у IBF/USBA рейтингида 4-, WBA рейтингида 10- ва WBO рейтингида 11-ўринни эгаллаб турибди.
