UzAuto Motors компанияси 19 январь кунидан аввал тузилган шартномалар бўйича Chevrolet Lacetti ва Cobalt автомобиллари автомагнитоласиз етказиб берилишини маълум қилди.
Глобал миқёсда яримўтказгичлар тақчиллиги UzAuto Motors учун GM сертификатига эга ягона радиомагнитофон ишлаб чиқарувчи Кореянинг Humax компаниясига ҳам таъсир кўрсатган. Автомобилларга автомагнитолаларни етказиб бериш номаълум муддатга тўхтатилган.
«UzAuto Motors компанияси автомобилларни етказиб бериш муддатининг узайиши, конвейерларнинг тўхтаб қолиши ҳамда ишчи ўринларнинг қисқаришини олдини олиш учун бошқа автомобиль ишлаб чиқарувчилар томонидан бундай шароитларда амалда қўлланилган ягона тўғри қарор — автомобилларни магнитоласиз ишлаб чиқариш дея қабул қилди», — дейилади хабарда.
Келтирилишича, бу ҳаридорнинг розилиги билан амалга оширилувчи ушбу мажбурий чоранинг қўлланилиши юзлаб истеъмолчиларга узоқ кутилган автомобилларни яқин орада етказилишини таъминлайди.
Компания ушбу вазиятдан чиқиш учун магнитоласиз автомобиль харидорларига иккита вариант таклиф этган:
- Ишлаб чиқарувчи томонидан магнитола қурилмаси ҳамда унинг ўрнатилиш харажатларининг қопланиши билан яқин орада ўз автомобилини магнитоласиз олиш. Хоҳишингизга кўра, бозордан ўзингизга ёққан хоҳлаган турдаги автомагнитолани УзАуто Моторс расмий дилерларида ўрнатиш билан автомобилга берилган кафолатни йўқотмайсиз.
- Автомобилни кейинчалик текин қайта жиҳозлаш билан магнитоласиз олиб кетиш. Ишлаб чиқарувчи томонидан магнитола етказиб берилгандан сўнг, автомобилни қайта жиҳозлаш.
Компания харидорлардан узр сўраган: «Сизни ишонтириб айтадики, юзага келган ноқулайликни минималлаштириш ва ҳар қандай вазиятда муроса қилиш учун имкон қадар барча ишларни қилади».
