БМТнинг Болалар жамғармаси (ЮНИСЕФ) Япония ҳукуматининг 433 минг АҚШ доллари миқдоридаги гранти доирасида Сурхондарё вилоятининг Термиз туманидаги бирламчи тиббиёт муассасаларида сув таъминоти, санитария ва гигиена тизимини яхшилаш бўйича чора-тадбирларни амалга оширади. Бу ҳақда «Газета.uz»га ЮНИCЕФнинг Ўзбекистондаги ваколатхонаси хабар берди.
Дастур сув қувурларини ётқизиш, сув учун резервуарлар, сув юмшатувчи ва фильтрловчи ускуналарни ўрнатиш, санитария-техник, шунингдек, чиқиндиларни йўқ қилиш иншоотларини қуриш ва реконструкция қилиш, электр энергияси ва иссиқ сув таъминоти учун қуёш батареялари ўрнатишни кўзда тутади. Дастур, шунингдек, замонавий санитария-гигиена тизими инфратузилмаларидан доимий фойдаланиш ва уларга хизмат кўрсатишни ривожлантиришни ҳам қўллаб-қувватлайди.
ЮНИСЕФ лойиҳани 2022 йилнинг мартидан 2023 йил февралига қадар амалга оширади. Лойиҳа шарофати билан Термиз туманидаги 80 мингга яқин аҳолининг еттита бирламчи тиббий-санитария муассасаларида такомиллаштирилган санитария-гигиена хизматларидан ва ишончли чиқиндиларни бошқариш тизимидан фойдаланиши учун имконият яратиши кутилмоқда. Шунингдек, уларга гигиена бўйича ўқув-ахборот воситалари ҳам тақдим этилади.
