The Lancet илмий журналида аргентиналик олимларнинг «Спутник V» вакцинаси таъсирида пайдо бўлган антитаначаларнинг узоқ муддатли таҳлилига бағишланган тадқиқотлари натижалари эълон қилинди, дея хабар бермоқда Daily Afisha.
Маълум қилинишича, тадқиқот доирасида олимлар Россиянинг «Спутник V» вакцинаси билан коронавирусга қарши эмланган Тукуман шаҳри аҳолисини кузатганлар. Тадқиқот натижаларига кўра, антитаначаларнинг етарли даражаси эмланганларнинг атиги 31 фоизида сақланиб қолганлиги аниқланган.
Тадқиқотда кўнгилли равишда 602 киши (шундан 66 фоизи илгари COVID-19 билан касалланмаган) иштирок этганлиги айтилмоқда. «Спутник V» билан эмлангандан сўнг, улардан фақат 25 фоизида енгил ножўя таъсирлар қайд этилган. Вирусга антитаначалар биринчи дозадан кейин кўнгилли эмланганларнинг 48 фоизида, иккинчи дозадан кейин эса 97,6 фоизида аниқланган.
Кузатувларга кўра, икки ойдан кейин антитаначалар даражаси пасайишни бошлаган, бироқ аксариятида (94 фоиз) эмлашдан кейин уч ойгача сақланиб қолган. Олти ой ўтгач, кўнгилли эмланганларнинг атиги 31 фоизида COVID-19 га иммун жавоб бериш учун етарли миқдорда антитаначалар сақланиб қолганлиги аниқланди.
