Варшавада минглаб миллатчиларнинг намойиши бўлиб ўтди
Варшавада Польша Мустақиллик куни муносабати билан ўнг қанот миллатчилик ҳаракати томонидан ташкил этилган анъанавий марш бўлиб ўтди, деб хабар берди РИА Новости.
Пайшанба куни Польша мустақиллик тикланганининг 103 йиллигини нишонламоқда. Бу йилги намойишлар «Мустақиллик сотилмайди» шиори остида ўтказилмоқда.
Тинчлик бўйича Нобел мукофоти совриндори, ЖАРнинг собиқ президенти Фредерик де Кларк вафот этди
Жанубий Африканинг собиқ президенти Фредерик де Клерк 85 ёшида вафот этди. Бу ҳақда Риа Новости хабар берди. Де Клерк 1989−1994 йилларда Жанубий Африканинг энг сўнги оқ танли президенти бўлган.
«Бугун эрталаб собиқ президент Фредерик де Клерк саратон, мезотелиома билан курашиб, ўз уйида тинчгина вафот этди», — деди де Клерк жамғармаси вакили.
Июнь ойида жамғарма де Клеркда саратон касаллиги аниқлангани, собиқ президент иммунотерапия олаётгани ҳақида хабар берган эди.
Фредерик Виллем де Клерк 1989 йилнинг августидан 1994 йилнинг майигача Жанубий Африка президенти бўлган. У апартеид тизимини демонтаж қилишни якунлади ва 1990 йилда Нелсон Манделани қамоқдан озод қилди. 1993 йилда де Клерк ва Мандела биргаликда тинчлик бўйича Нобел мукофотига сазовор бўлди. 1994 йилнинг майидан 1996 йилнинг июнигача Фредерик Виллем де Клерк Жанубий Африканинг биринчи вице-президенти лавозимида ишлаган — ТАСС.
Латвия парламенти Георгий ленталаридан фойдаланишни тақиқловчи қонунни тасдиқлади
Латвия Сейми (парламенти) пайшанба куни бўлиб ўтган йиғилишда учинчи, якуний ўқишда оммавий тадбирлар — кўнгилочар ва байрам тадбирлари, шунингдек, йиғилишлар вақтида Георгий ленталаридан фойдаланишни тақиқлашни назарда тутувчи қонунчиликни маъқуллади. Ушбу жараён парламент сайтида трансляция қилинди.
Овоз бериш жараёнида депутатларнинг кўпчилиги «Оммавий кўнгилочар тадбирлар ва байрам тадбирлари хавфсизлигини таъминлаш тўғрисида»ги ва «Мажлислар, юришлар ва пикетлар тўғрисида»ги қонунларга тегишли ўзгартиришлар киритишни қўллаб-қувватлади.
«Латвиядаги кўплаб руслар бу қонун лойиҳасини ўзларининг миллий қадр-қимматига ҳақорат сифатида қабул қилишлари мумкин. Бу рамз Европа Иттифоқига аъзо бирорта давлатда тақиқланмаган. Ишончим комилки, Латвия бу борада кашшоф бўлмаслиги керак», — деди Латвия парламенти депутати Николай Кабанов.
Ўз навбатида, Россиянинг Латвиядаги элчихонаси қонунчиликка киритилган ўзгартиришлар жамиятни миллий ва мафкуравий бўлинишга қаратилганини маълум қилди — ТАСС.
Сеулда америкалик дипломат автоҳалокат содир этиб, АҚШ ҳарбий базасига яширинди
Америкалик дипломат Жанубий Корея пойтахти Сеулда бахтсиз ҳодиса келтириб чиқарган ва АҚШ ҳарбий базасида полициядан яширинган. Yonhap агентлигининг хабар беришича, у йўлни ўзгартираётганда олдида турган такси билан тўқнашиб кетган ва воқеа жойидан қочиб кетган.
«Биз америкалик дипломатнинг баёнотини эшитганимиздан кейин айбловлар бўйича қарор қабул қилишни режалаштирмоқдамиз», — деди Сеул полицияси вакили.
Бахтсиз ҳодисадан кейин такси ҳайдовчиси дипломатнинг машинасини Сеулнинг Ёнгсан туманидаги АҚШ ҳарбий базасигача кузатиб борган. Ҳозирча шахси аниқланмаган дипломат полиция талабига кўра машинаси ойнасини очишдан, шунингдек, спиртли ичимликдан мастлик даражасини аниқлаш учун тест топширишдан бош тортган.
Агентлик маълумотларига кўра, машинада яна уч киши бўлган.
Камерун жанубидаги университетда юз берган портлаш оқибатида 11 талаба жароҳатланди
Инглиз тилида сўзлашувчи жануби-ғарбий минтақа пойтахти Буэа шаҳрида содир бўлган портлашда камида 11 нафар талаба жабрланди. Бу ҳақда Agence France-Presse университет ректорига таяниб хабар берди.
Унинг сўзларига кўра, ҳодиса полиция ва қуролланган сепаратистлар ўртасидаги ҳарбий тўқнашувлар оқибатида содир бўлган.
Жанубий Африканинг News-24 ахборот хизмати хабарига кўра, ярадорлар касалхонага ётқизилган, уларнинг аҳволи барқарор деб баҳоланмоқда. Университет ҳудуди қуршаб олинган, ҳодиса юзасидан тергов ҳаракатлари олиб борилмоқда.
Нобел мукофоти совриндори Малала Юзуфзой турмушга чиқди
Покистонлик инсон ҳуқуқлари фаоли, тинчлик бўйича Нобел мукофоти совриндори Малала Юсуфзой турмушга чиқди. Бу ҳақда у сешанба куни ўз Instagram саҳифасида маълум қилди.
«Бугун менинг ҳаётимдаги унутилмас кун. Ассер билан умримизнинг охиригача бирга бўлиш учун турмушга қурдик», — деб ёзди у. Малаланинг қўшимча қилишича, тўй ислом анъаналари бўйича 24 ёшли қиз яшайдиган Бирмингемда иккала оила иштирокида бўлиб ўтган.
Юсуфзай 11 ёшида интернетда блог юрита бошлаганида, «Толибон» ҳаракатининг ўзи туғилган Хайбер-Пахтунхва вилоятининг Сват туманида шариат қонунларини ўрнатишга уринишларини танқид қилиб, шуҳрат қозонган. 2012 йилнинг 9 октабрида у дарсдан уйига қайтаётганида жангарилар томонидан ҳужумга учраган. Ниқоб кийган қуролланган шахслар мактаб автобусини тўхтатган, улардан бири ичкарига кириб, Малалага қарата ўқ узган ва у боши ва бўйнидан яралаган. У 2013 йил январь ойида шифохонадан чиқарилган ва реабилитация курсидан сўнг инсон ҳуқуқлари бўйича ишига қайтган — ТАСС.
2014 йилда Малала болалар ҳуқуқларини ҳимоя қилувчи ҳиндистонлик Каилаш Сатяртҳи билан бирга тинчлик учун Нобел мукофотига сазовор бўлди. Малала Юсуфзой тарихдаги энг ёш Нобел мукофоти совриндори ҳисобланади.
