«Ўзавиация» агентлиги томонидан iFly Airlines авиакомпаниясига санкция тариқасида Ўзбекистонга чартер парвозларини амалга оширишни вақтинчалик тўхтатиш тўғрисида қарор қабул қилинди. Бу ҳақда Транспорт вазирлиги матбуот хизмати хабар берди.
Қайд этилишича, «Ўзавиация» агентлигидан тегишли рухсатнома олмасдан туриб авиачипталарни сотиш амалиётини тугатиш тўғрисида огоҳлантириш хати юборилган.
Компания ушбу огоҳлантиришга қарамай тегишли рухсатномаларни олмасдан қўпол равишда талабларни бузиб ноябрь ойида Москва — Урганч — Санкт-Петербург — Урганч — Москва, Навоий — Москва ҳамда Санкт-Петербург — Навоий — Санкт-Петербург йўналишларида чартер парвозлари учун авиачипталар сотувини ташкил этган.
Натижада авиачиптада кўрсатилган вақтда йўловчилар аэровокзалларга келишган ва белгиланган йўналишда парвознинг бажарилмаслиги улар ўртасида ижтимоий кескинликка олиб келган, дейилади хабарда.
Uzbekistan Airports 8 ноябрь куни «Навоий» аэропортида Навоий — Москва ва Навоий — Санкт-Петербург йўналишлари бўйича iFly рейслари билан парвозни амалга оширмоқчи бўлган 200 га яқин одам тўплангани ҳақида хабар берган. Улар чипталарни «Восток Бухоро» компаниясининг Самарқанд, Бухоро ва Урганч шаҳарларидаги филиалларидан харид қилишган. Уларга чипталар пули қайтариб берилиши ваъда қилинган.
5 ноябрь куни Урганч аэропортида 300 га яқин одам йиғилган эди.Уларда жадвалда бўлмаган iFly авиакомпаниясининг Москвага парвози учун чипталар бўлган. Вазият ҳал бўлгач, Москвадан самолёт жўнатилган эди.
Транспорт вазирлиги қайд этишига кўра, авиакомпаниялар томонидан бундай ҳолатлар такрорланган тақдирда «Ўзавиация» агентлиги парвозларни амалга ошириш учун берилган экплуатация рухсатномаларни бекор қилади.
Авиачипталарни сотиб олиш ёки сотишдан олдин «Ўзавиация» агентлиги сайтида танишиб чиқиш мумкин.
