Тошкент вилояти «Ойбек» чегара-божхона пости ходимлари томонидан 156 кгга яқин гиёҳвандлик воситаларини мамлакатга олиб киришга бўлган уринишни аниқлади. Бу ҳақда Давлат божхона қўмитаси матбуот хизмати хабар берди.
Маълумотга кўра, 30 октябрь соат 15:00 да «Ойбек» чегара божхона постига кириб келган фуқаро Б.У. бошқарувидаги «DAF» машинаси ўрнатилган тартибда божхона кўригидан ўтказилган. Ҳужжатларга кўра, узум ортилган автомашина транзит орқали Россияга етиб бориши керак бўлган.
«Янгийўл» божхона постида ходимлар томонидан машина кўздан кечирилган. Транспортга ортилган узумлар туширилгач, тиркаманинг пол қисми очиб кўрилган.
Полда яширин бўлмалар ҳосил қилиниб, улар орасига эса яшил рангли елим идишлар полиуретан кўпик кўмагида зичлаб жойлаштирилгани аниқланган. 141 дона елим идишда идиши билан ҳисоблаганда жами 156 кгга яқин гиёҳвандлик воситалари борлиги маълум бўлган.
«Қайд этилишича, идишлардаги гиёҳвандлик воситаларининг ҳидини хизмат итлари пайқамаслиги учун идиш қопқоғи махсус смола, яъни қатрон ёрдамида ишлов берилгани маълум бўлган. Ўтказилган тезкор тадбир давомида 149,76 килограмм гашиш, 4,44 килограмм опий ва 1,52 килограмм героин гиёҳвандлик воситалари ашёвий далил сифатида олинган», дейилади хабарда.
Ҳозирда мазкур ҳолат юзасидан божхона органлари томонидан жиноят иши қўзғатилган.
