Россиялик сайёҳларнинг 16 фоизи ишланмайдиган кунларда Ўзбекистонга учмоқчи
Россияда 29 октабрдан 7 ноябргача эълон қилинган ишланмайдиган кунлар эълон қилингандан сўнг ички ва ташқи рейсларга талаб 1,5 бараварга ошди. Рус сайёҳлари энг кўп танлаётган жой Ўзбекистон бўлмоқда — саёҳатчиларнинг 16,6 фоизи айнан шу мамлакатни афзал кўришди, деб хабар беради Daily Storm нашри Tutu.ru сайёҳлик хизмати маълумотларига таяниб. Маълумотларга кўра, Россиядан Ўзбекистонга бориш-қайтиш учун чипта нархи ўртача 21 410 рублни (3,2 млн сўмни) ташкил қилган.
Шунингдек, саёҳат қилувчиларнинг 14,1% ишланмайдиган ҳафтада Арманистонга боришни режалаштирган. Россиядан Арманистонга бориш-қайтиш учун чипта нархи ўртача — 16 681 рубль (2,5 млн сўм). Кейинги ўринда Туркия энг кўп танланган давлатлар қаторида бўлиб, ушбу давлат курортларига бориш учун сайёҳларнинг 13,5 фоизи чипта харид қилган. Туркияга бориш-қайтиш учун чипта нархи ўртача — 25 594 рублни (3,8 млн сўмни) ташкил қилган.
Шунингдек:
- Доллар курси 2020 йил июнь ойидан бери илк бор 70 рублдан пастга тушди. Россия Марказий банки асосий ставкани бирданига 0,75 фоизга оширди ва энди асосий ставка 7,5 фоизни ташкил этади. Қарор учун асосий омил инфляция дея қайд этилган. Марказий банк 7,4 фоизгача кўтарилган инфляцияни 4 фоизгача қайтармоқчи — CBR.
Байден Хитой билан совуқ урушни хоҳламаслигини айтди
Вашингтон Хитой билан совуқ урушни хоҳламайди, бироқ чекинмайди. Бу ҳақда пайшанба куни Мэриленд штатининг Балтимор шаҳрида ўтказилган оммавий йиғилишда АҚШ президенти Жо Байден CNN телеканали орқали маълум қилди.
«Сиз одамлардан Байден Хитой билан янги совуқ уруш бошламоқчи деган гапларни эшитгансиз. Мен Хитой билан совуқ урушни хоҳламайман. Мен Хитой биз ўз фикримиздан қайтмаслигимизни ва қарашларимизни ўзгартирмаслигимизни тушунишини истайман», — деди Жо Байден.
Байден агар Хитой Тайванга хужум қилса, уни ҳимоя қилишга мажбур эканлигини айтди. АҚШ 1979 йилда Тайван билан дипломатик алоқаларни узган ва Хитой билан муносабатларни ривожлантирган эди. Вашингтон Хитой сиёсатини тан олса-да, Тайван маъмурияти билан алоқани давом эттирмоқда ва оролни қурол-яроғ билан таъминламоқда. Ўтган йили АҚШнинг 45-президенти Дональд Трамп маъмурияти Гонконгдаги вазият туфайли Пекин билан муносабатларнинг кескинлашуви фонида Тайван билан алоқалар ва алмашувларни сезиларли даражада кучайтирди, бу эса Хитой расмийларининг норозилигига сабаб бўлди — ТАСС.
Шунингдек:
- АҚШнинг собиқ президенти Дональд Трамп чоршанба куни эълон қилган «TRUTH social» янги ижтимоий тармоғига хакерлик ҳужуми уюштирилди. Бу ҳақда жума куни The New York Times нашри ҳужумни амалга оширган хакерларга таяниб хабар берди. «TRUTH social» ҳали фойдаланувчилар учун мавжуд эмас, бироқ хакерлар унинг синов версиясига кира олишганини даъво қилди. Улар бир нечта сохта аккаунтлар яратишга муваффақ бўлишган. Хакерлар ўз шахсларини яширишни танлаган, лекин ўзларини Anonymous гуруҳига алоқадор эканликларини маълум қилган.
Беларусда ниқоб режими бекор қилинди
Беларус Соғлиқни сақлаш вазирлиги COVID-19 пандемияси шароитида жисмоний шахслар учун мажбурий ниқоб режимини бекор қилди. Бу ҳақида РИА Новости хабар берди.
18 октябрь куни Беларусь Соғлиқни сақлаш вазирлиги поликлиникаларда мунтазам тиббий ёрдам кўрсатишни тўхтатишга қарор қилганини эълон қилди. Беларусь президенти Александр Лукашенко эпидемиологик вазиятга бағишланган йиғилишда COVID-19га қарши мажбурий эмлашларга, ниқоб режимига риоя қилмаганлик учун жарималарни танқид қилган, шу билан бирга, мунтазам тиббий ёрдам кўрсатишни бекор қилмасликни талаб қилган. Унинг сўзларига кўра, жарима ва мажбурлаш орқали эмас, балки шахсий масъулиятини ошириш орқали инфекция тарқалишига қарши курашиш керак. Президентнинг сўзларига кўра, ҳар бир инсон ўз тақдирини ўзи хоҳлаганча бошқариши керак.
Актёр Алек Болдуин фильм тасвирга олиш пайтида тасодифан оператор ва режиссёрни отиб қўйди
Америкалик актёр Алек Болдуин иштирокидаги «Rust» фильмини суратга олиш пайтида нотўғри отилган қурол туфайли оператор ва режиссёр турли даражадаги тан жароҳатлари олган ҳамда оператор кейинчалик касалхонада вафот этган. Бу ҳақда TMZ портали хабар берди. Хабарга кўра, воқеа Нью-Мексико штатида бўлиб ўтган. Актёрлар бўш патронларни ўққа тутишлари керак бўлган, бироқ суратга олиш пайтида ўқ ёки унинг парчаси яқин атрофдаги икки кишини яралаган.
Оқибатда 42 ёшли оператор Галина Хатчинс тез тиббий ёрдам машинасида касалхонага олиб борилган. У олган тан жароҳатлари туфайли касалхонада вафот этган. 48 ёшли режиссёр Жоэл Соуса эса касалхонада оғир аҳволда экани айтилмоқда. Вилоят полиция бошқармаси операторни ўлдирган ўқ Болдуиннинг қўлидаги қуролдан отилганини тасдиқлади. Ҳодисага инсон омили сабаб бўлганми ёки реквизитлар бузилганми, ҳозирча номаълум — ТАСС.
