6 августда Вазирлар Маҳкамасининг «Чорвоқ сув омбори атрофидаги тоғ ва тоғ олди ҳудудларда ўсимлик қопламининг қисқаришини олдини олишга қаратилган комплекс чора-тадбирлар тўғрисида"ги қарори қабул қилинди, дея хабар бермоқда Norma.
Ҳужжатда таъкидланишича, охирги ўн йил ичида сув омбори атрофидаги дала ландшафтларининг иқлим ўзгариши натижасида ўсимлик қопламининг миқдори кескин камайган, бу тупроқ қатламларининг мустаҳкамлигига таъсир қилади ва чангнинг тез кўтарилишига олиб келади.
2021 йилнинг 1 октябрига қадар Чорвоқ сув омбори атрофи ва унга туташ ҳудудлардаги барча тоифадаги ерларда ўрмон билан қопланган ва ўрмон барпо қилиш мумкин бўлган майдонларни хатловдан ўтказиш белгиланмоқда. Хатлов натижаси асосида белгиланган тартибда қишлоқ хўжалигига мўлжалланган ерларни ўрмон фонди ерлари тоифасига ўтказиш ҳамда чорва молларининг боқилиши тақиқланади.
Геоахборот технологиялари, шу жумладан, ерни масофадан зондлаш ва космик мониторинг технологиясини кенг жорий этган ҳолда, ўрмон фондининг ҳаётий даври ҳақидаги аниқ ва доимий маълумотларни таҳлил қилиш, ўрмон фонди деградацияси ва ўрмонларнинг ноқонуний кесилишини аниқлаш ва назорат қилиш тизимини йўлга қўйиш белгиланмоқда.
Шунингдек, 2021−2025 йилларда Чорвоқ сув омбори ҳамда унинг атрофидаги экотизимни ҳимоя қилиш ва қайта тиклаш, ерлар деградациясининг олдини олиш ҳамда чўлланишга қарши курашишга қаратилган фундаментал ва амалий тадқиқотлар ҳамда инновацион лойиҳаларни амалга ошириш дастури тасдиқланди.
Ҳужжат тасдиқлаган жадвалдан келиб чиқиб, Чорвоқ сув омбори атрофидаги ҳудудларни тўлиқ ўрмонзорлаштириш 2023 йилгача якунланиши режалаштирилмоқда.
