АҚШ ҳукумати ишлаб чиқаётган режага мувофиқ, мамлакат ҳудудига кираётган барча чет элликлар, айрим истисноларни ҳисобга олмаганда, COVID-19 га қарши тўлиқ эмланган бўлиши керак. Бу ҳақда NBC News, CNN, The New York Times ва бошқа ОАВ хабар қилди.
Режанинг АҚШ ўз чегараларини қайтадан очадиган вақтга қадар тайёр бўлиши кутилмоқда. Ҳукуматнинг бу борадаги режалари тўғрисида Оқ уй вакили журналистларга маълум қилди. Унинг қайд этишича, ҳукумат авиакомпаниялар ва сайёҳлик саноатини қўллаб-қуввалаш учун халқаро туризмни қайта тиклашни хоҳламоқда. Бироқ COVID-19 ҳолатлари сони ортаётгани ва дельта штамми тарқалаётгани сабабли амалдаги чекловларни бекор қилишга тайёр эмас.
Ҳозирда мамлакатга учиб келаётган чет элликлар ва АҚШ фуқароларидан коронавирусга салбий ПЦР-тест ёки COVID-19 дан тузалгани тўғрисидаги маълумотнома талаб қилинади. Эрон, Буюк Британия, Жанубий Африка, Ҳиндистон ва бошқа айрим давлатлардан сайёҳларнинг мамлакатга кириши тақиқланган.
