Германияда сентябр ойида кекса ёшдаги ва хавф ости гуруҳида бўлган фуқароларни COVID-19 га қарши вакцинанинг учинчи дозаси билан эмлашни таклиф эта бошлайдилар, деб хабар бермоқда The Guardian. 12 ёшдан ошган болалар ҳам эмлаш дастурига киритилади.
The New York Times аниқлик киритишича, учинчи доза учун Pfizer/BioNTech ёки Moderna вакциналари қўлланилади. Фуқаро бундан олдин қайси вакцинани олганидан қати назар мазкур препаратлар билан эмланади.
Охирги маълумотларга кўра, бугунги кунда Германияда аҳолининг ярмидан кўпи тўлиқ эмланган ва аҳолининг қарийб 62 фоизи вакцинанинг камида бир дозасини олган.
Аввалроқ, 60 ёшдан ошган одамларни Pfizer/BioNTech вакцинасининг учинчи дозаси билан эмлаш тўғрисидаги қарор Исроилда ҳам дельта штаммининг кучайиб бораётган инфекцияси фонида қабул қилинган эди.
Pfizer июль ойида Pfizer/BioNTech`нинг учинчи дозаси тананинг дельта штаммидан ҳимоясини «сезиларли даражада» кучайтириши мумкинлиги ҳақидаги янги маълумотларни эълон қилган эди. Компаниянинг таъкидлашича, препаратнинг учинчи дозасини олган 18 дан 25 ёшгача бўлган одамларда дельта штаммига қарши антитаначалар даражаси беш баравар ошади.
Pfizer/BioNTech ва Moderna вакциналари COVID-19 га қарши мРНК вакциналаридир. Мушак ичига, мос равишда 21 ва 28 кунлик танаффус билан, икки дозада эмланади.
