Вазирлар Маҳкамаси 3 июль куни «Саудия тараққиёт жамғармаси иштирокида «Мактабгача таълим соҳасида давлат-хусусий шерикликни қўллаб-қувватлаш лойиҳаси»ни амалга ошириш чора-тадбирлари тўғрисида» ги қарорини қабул қилди. Бу ҳақда Norma хабар бермоқда.
2020 йил 17 декабрда Ўзбекистон ҳукумати ва Саудия тараққиёт жамғармаси (СТЖ) ўртасида «Мактабгача таълим соҳасида давлат-хусусий шерикликни қўллаб-қувватлаш» лойиҳасини молиялаштириш учун йиллик 2 фоиз ставкада 5 йиллик имтиёзли давр билан 20 йиллик муддатга 10,9 млн АҚШ доллари эквивалентидаги (41 млн Саудия Арабистони риали) қредит битими имзоланган. Шартнома президентнинг 12 апрелдаги «Мактабгача таълим соҳасида давлат-хусусий шериклигини ривожлантириш бўйича қўшимча чора-тадбирлар тўғрисида» ги қарорига мувофиқ тузилган.
Ҳужжат билан қуйидагилар тасдиқланди:
- «Мактабгача таълим соҳасида давлат-хусусий шериклигини қўллаб-қувватлаш» лойиҳасининг асосий техник-иқтисодий кўрсаткичлари;
- ушбу лойиҳа бўйича асосий қарз ва фоизларни тўлашнинг прогноз жадвали.
Лойиҳа доирасида тижорат банкларига имтиёзли кредитлар миллий валютада тақдим этилади. Саудия риалига нисбатан миллий валюта курсининг ўзгариши туфайли салбий харажатлар (валюта таваккалчилиги) Ўзбекистон миллий бюджетидан қопланади.
Лойиҳанинг қопланиш муддати 3 йил (2021−2023).
Қорақалпоғистон Республикаси ва вилоятларда ДХШ тамойили асосида нодавлат мактабгача таълим муассасаларини молиялаштирадиган тижорат банклари СТЖ маблағлари ҳисобидан хусусий шерикларга имтиёзли кредитлар бериш учун жавобгар ҳисобланади.
