Ижтимоий тармоқларда Тошкент метрополитенининг бир нечта бекатларида свет ўчгани акс этган видео лавҳалар тарқалди. Мазкур ҳолат юзасидан метрополитен ахборот хизмати изоҳ берди.
Маълум қилинишича, 7 июль куни соат 12:55 — 13:05 оралиғида Тошкент шаҳар электор таминоти тизимида юзага келган носозлик сабабли метрополитенининг «Чилонзор», «Юнусобод», «Ўзбекистон» йўналишларидаги бекатларида ёритувчи ускуналар ишламаган, экскалаторлар тўхтаган.
Қайд этилишича, бу ҳолатда поездлар ҳаракати тўхтамаган, чунки поездларнинг ҳаракатини таъминловчи электр таъминоти алоҳида.
Эслатиб ўтамиз, 7 май куни метронинг ҳалқа йўналишидаги «7-бекат» станциясида электр таъминотида вақтинчалик узилиш кузатилган эди.
Аввалроқ, «Газета.uz» 8 апрелда Тошкент метросининг Сергели йўналишида поезд техник сабабларга кўра тўхтаб қолгани, йўловчилар эса эстакада орқали эвакуация қилингани, 10 апрелда «Пушкин» ва «Буюк ипак йўли» станциялари ўртасида ҳаракатланаётган метро вагонининг эшиги очиқ қолгани, апрель охирига келиб «Новза» метро бекати яқинида поезд тўхтаб қолиб, йўловчилар бекатгача рельслардан юриб боргани ҳақида хабар қилганди.
Мазкур воқеалардан сўнг, 25 июнь куни президент Шавкат Мирзиёев метродаги муаммолар ечимига эътибор қаратган эди. «Ҳозир 40 млрд сўмлик алоҳида подстанция харид қиляпмиз. Тошкент метрополитенининг энергия тизими алоҳида бўлади», — деган эди у.
