25 июнь куни президент Шавкат Мирзиёев Тошкент шаҳри ва туманлар ҳокимлиги, секторлар раҳбарлари ва маҳалла раислари иштирокидаги йиғилишда пойтахт метрополитенидаги сўнгги муаммоларни бартараф этиш масаласига алоҳида тўхталди.
«Тошкент метрополитени бўйича катта лойиҳаларни амалга оширдик. Aлбатта, кейинги пайтда айрим муаммолар кузатиляпти. Лекин ўша муаммолар негизига етиб боришимиз керак», — дея давлат раҳбарининг сўзларини келтирмоқда Kun.uz нашри.
Шавкат Мирзиёев метрополитеннинг электр таъминоти тизими кўп йиллар давомида модернизация қилинмаганлигини ва бу техник камчиликларга олиб келганини таъкидлади.
«Ҳозир 40 млрд сўмлик алоҳида подстанция харид қиляпмиз. Тошкент метрополитенининг энергия тизими алоҳида бўлади», дея қўшимча қилади Шавкат Мирзиёев.
18 март куни «Олмазор» ва «Сирғали» метро йўналишининг «Бекат-1» бекатлари оралиғида иккита 2 та таркиб орасида тўқнашув содир бўлди. 8 апрель куни Тошкент метрополитенининг Сергели йўналишида поезд техник сабабларга кўра тўхтаб қолди. 9 апрель куни ижтимоий тармоқларда метро ҳаракати вақтида вагонлардан бирининг эшиги очиқ қолгани акс этган видео лавҳалар тарқалди. Кейироқ мазкур ҳолатга сабаб бўлган уч ходим ишдан бўшатилди. 28 апрель куни «Новза» бекати яқинида поезд вагони техник носозлик оқибатида тўхтаб қолди. 7 май куни 21:00да Тошкент метрополитенининг ҳалқа йўналишидаги «7-бекат» станциясида электр таъминотида узилиш кузатилди.
21 майдан Тошкент метросининг Чилонзор ва Ўзбекистон йўналишлари ишлаш тартиби вақтинча соат 6:00 дан 23:00 гача ўрнатилди. Июнь ойининг бошидан бошлаб Тошкент ер усти метроси Ҳалқа йўлида соат 18:00 гача соатига чегараланган тезлик (30−35км/соат)да ҳаракатланмоқда.
