Буркина-Фасода жангариларнинг қишлоққа ҳужуми натижасида 160 киши ҳалок бўлди

5 июнга ўтар кечаси Буркина-Фасо шимоли-шарқидаги Солхан қишлоғига жангарилар ҳужуми натижасида 160 киши ҳалок бўлди. «Ўтган куни биз 160 кишини, шу жумладан 20 га яқин болани учта қабрга дафн этдик», дея ТАСС AFP’га таяниб келтирмоқда. Мамлакат ҳукумати ушбу фожиа муносабати билан уч кунлик миллий мотам эълон қилди.

ТАССнинг ёзишича, Буркина-Фасо сўнгги уч йил ичида Ғарбий Aфрикадаги исломий гуруҳлар томонидан уюштирилган террористик ҳаракатлар марказига айланди. Ушбу давр мобайнида террорчилар мингдан ортиқ тинч аҳолини ўлдирган, зўравонликлар туфайли 1,5 млндан ортиқ одам уйларини ташлаб, қочқинларга айланди. — ТАСС.


«Чернобиль туризм соҳасида кучли магнитга айланиши керак» — Зеленский

Чернобиль халқаро ва ички туризм зонасига, бегоналашган ҳудуд [Чернобиль зонаси халқ орасида шундай номланади] эса тикланиш ҳудудига айланиши керак. Бу ҳақда «Украина 30. Экология» форуми давомида Украина президенти Владимир Зеленский айтиб ўтди. «Менинг ташаббусим билан [Чернобиль] бегоналашган ҳудудни тиклаш жараёни бошланди ва уч йилга Чернобиль зонасини ривожлантириш дастури тасдиқланди. Унда инфратузилмани ўзгартириш, ҳудудни ривожлантиришнинг янги концепцияси, Чернобилнинг ички ва халқаро тарғиботи кўзда тутилган. Бу Украинада ҳам, бутун дунёда ҳам туризм учун кучли магнитга айланиши керак, бегоналашган ҳудуд эса тикланиш ҳудудига айланиши керак», — деди Украина раҳбари.

Ҳозирда ушбу ҳудудда велосипед маршрути ўтказилган. Йўналишнинг умумий узунлиги 45 км дан ортиқ. Шунингдек, Украина Маданият ва ахборот сиёсати вазирлиги Чернобиль зонасини ЮНЕСКОнинг Жаҳон мероси рўйхатига киритилишини таъминлаш устида иш олиб бормоқда. — ТАСС.

Аввалроқ Чернобиль AЭСидаги фалокатнинг 35 йиллиги муносабати билан Украина Хавфсизлик хизмати ўз архивидаги баъзи махфий ҳужжатларни ошкор қилган эди. «Газета.uz» ушбу фожиа ҳақида «Шаҳарни арвоҳга айлантирган авария — Чернобиль АЭСидаги портлаш тарихи» номли махсус мақоласида тақдим этган.


Google Францияда 220 млн евро миқдорида жаримага тортилди

АҚШнинг Google компанияси Францияда рақамли реклама бозоридаги устун мавқеидан суиистеъмол қилганликда айбланиб, 220 млн евро жарима тўлайди. Франциянинг монополияга қарши регулятори Google ўз мавқеидан фойдаланиб, ўз реклама хизматларини рақобатчиларга зарар етказадиган тарзда тарғиб қилган деган хулосага келди. Регулятор билан тузилган келишув доирасида компания Google Ad Manager реклама хизматининг учинчи шахслар билан ўзаро алоқаларини яхшилаш орқали ўз амалиётини ўзгартиришга ваъда берди. — Bloomberg.


Жефф Безос акаси билан бирга 20 июль куни космосга учади

Amazon ва Blue Origin аэрокосмик компанияси асосчиси Жефф Безос акаси Марк Безос билан бирга космосга учади. «Беш ёшимдан бери мен коинотга саёҳат қилишни орзу қилардим. 20 июль куни мен ушбу саёҳатни акам билан бирга амалга ошираман. Энг яқин дўстим билан — энг буюк саргузашт», — деб ёзган Безос Instagram’даги саҳифасида.

Парвоз Blue Origin томонидан яратилган New Shepard космик кемасида амалга оширилади. Ушбу ракета бир босқичли бўлиб, Ер атмосферасидан ташқарида қисқа суборбитал сайёҳлик парвозлари учун мўлжалланган.


Перудаги президентлик сайловларида Кейко Фухимори ғолиб бўлмоқда

Фото: Кейко Фухимори. EPA / ERNESTO ARIAS

Ўнг қанот «Халқ ҳокимияти» партиясининг раиси Кейко Фухимори Перудаги президентлик сайловларининг иккинчи босқичида етакчилик қилмоқда. Бюллетенларнинг 77,7 фоизи қайта ишлагандан сўнг олинган дастлабки маълумотларга кўра, Перунинг собиқ раҳбари Aльберто Фухиморининг қизи сайловчиларнинг 51,9 фоизи томонидан қўллаб-қувватланди. Унинг рақиби Педро Кастильо, чап қанот «Эркин Перу» партияси вакилига сайловчиларнинг 48.1 фоизи овоз берди.

Янги давлат раҳбарининг инаугурацияси 28 июлга белгиланган, унинг ваколати беш йилга мўлжалланган. Перуда овоз бериш 18 ёшдан 70 ёшгача бўлган фуқаролар учун мажбурий. — ТАСС.

Ўтган йилнинг ноябрь ойида Франсиско Сагасти Перунинг вақтинчалик президенти этиб сайланган эди.


Испания COVID-19'га қарши тўлиқ эмланган сайёҳларни қабул қилишни бошлайди

Испания 7 июндан бошлаб COVID-19'га қарши тўлиқ эмланган сайёҳлар учун ўз чегараларини очади. RTVE’нинг таъкидлашича, Pfizer, Moderna, AstraZeneca ва Janssen томонидан ишлаб чиқарилган, Европа дори-дармон агентлиги томонидан тасдиқланган вакциналар билан бирга, Хитойнинг Sinopharm ва Sinovac-Coronavac препаратлари билан эмланган сайёҳлар ҳам Испанияга ташриф буюришлари мумкин.

Испанияга ташриф буюришни истаган сайёҳ аввало мамлакатга киришдан камида 14 кун олдин тўлиқ эмлаш циклини ўтганини тасдиқлаши керак. Бунинг учун QR кодини ишлаб чиқарадиган махсус дастур орқали интернетда сўровнома тўлдирилади. Ушбу ҳужжат мамлакатга кетишдан олдин ҳам, паспорт назоратидан ўтаётганда ҳам тақдим этилиши керак. Шунингдек, 7 июндан бошлаб Испания мамлакат портларида круиз кемаларини қабул қилишга рухсат берди. Шу билан бирга, Бразилия, Ҳиндистон ва Жанубий Aфрикадан келган сайёҳлар ушбу мамлакатлардаги оғир эпидемиологик вазият туфайли Испанияга кира олмайди. — RTVE.


2020 йилда AҚШ ядровий қуролга сарфлаш бўйича дунё етакчисига айланди

AҚШ 2020 йилда ядровий қуролга ажратилган маблағ бўйича дунё етакчисига айланди. Мамлакат ўтган йили ушбу соҳага 37,4 млрд доллар сарфлаган. Бу ҳақда Халқаро ядро қуролини йўқ қилиш кампанияси (ICAN) ҳисоботида айтилган. Ҳисоботга кўра, 2020 йилда барча мамлакатларнинг ядро қуролларига сарфлаган маблағлари 72,6 млрд долларни ташкил этди, бу 2019 йилга нисбатан 1,4 млрдга кўп. AҚШдан ташқари биринчи бешталикка Хитой (10,1 млрд доллар), Россия (8 млрд), Буюк Британия (6,2 млрд) ва Франция (5,7 млрд) кирган. — ТАСС.


Шунигдек:

  • Покистоннинг Готки шаҳрида поездлардан бири рельсдан чиқиб кетиб, иккинчи йўловчи поездига урилди. 36 нафар йўловчи ҳалок бўлди. Бир неча одамлар вайроналар остида қолиб кетган.
  • БМТ 2021−2030 йилларга мўлжалланган Экотизимни тиклаш ўнйиллиги бошланганини эълон қилди. Фавқулодда тиклаш талаб қилинадиган экотизимларга ўрмонлар, тоғлар, чучук сув ҳавзалари, океанлар ва бошқалар киради, дея хабар берди БМТ.
  • Европа Иттифоқи мамлакатлари яна бир бор Қримга қарши санкцияларни бир йилга узайтириш тўғрисида қарор қабул қилишади.
  • Эрон Украинанинг Boeing ҳалокати қурбонларининг қариндошларига товон пули тўлашни бошлайди. Қурбонларнинг оилаларига 150 минг доллар берилади. 2020 йил 8 январь куни Теҳрон яқинида ҳалокатга учраган Украина халқаро авиакомпаниясининг Boeing йўловчи самолёти Эрон ҳарбийлари томонидан «инсон хатоси» сабабли тасодифан «қанотли ракета» ёрдамида уриб туширилган эди.