Европа Иттифоқида 2021 йил якунига қадар Ўзбекистон президенти Шавкат Мирзиёевнинг Брюсселга ташрифи кутилмоқда. Ташриф доирасида янги кенгайтирилган шериклик ва ҳамкорлик тўғрисидаги икки томонлама битим имзоланиши режалаштирилган, деб маълум қилди Европа Иттифоқининг Марказий Осиё бўйича махсус вакили Питер Буриан журналистлар билан мулоқот давомида.
Кенгайтирилган шериклик ва ҳамкорлик тўғрисидаги икки томонлама битим 1999 йилдан бери ҳамкорлик ва шериклик борасида амалда бўлган келишув ўрнини эгаллайди. Аввалроқ, Ўзбекистон ТИВ Европа Иттифоқи ва Ўзбекистон битимни 2020 йилда имзолаши кутилгани, бироқ COVID-19 пандемияси сабаб муддатга ўзгартириш киритишга тўғри келгани ҳақида хабар қилганди.
«Мазкур битимнинг асосий бўлимлари бўйича амалий ишлар ўз якунига етиб қолди. Биз бу жараённи йил сўнггига қадар якунлашга тайёрмиз. Бу президент Шавкат Мирзиёевнинг Брюсселга ташрифи учун яхши сабаб бўлади, деб ҳисоблаймиз», — деди Питер Буриан.
Махсус вакилнинг сўзларига кўра, Ўзбекистон раҳбарининг ташрифини «катта сабрсизлик» билан кутишмоқда. «Чунки бу икки томон ҳамкорликни ривожлантириш масаласига жуда жиддий ёндошаётганининг муҳим сигналидир», — дея таъкидлади элчи.
Дипломат Ўзбекистондаги ислоҳотлар жараёни Европа Иттифоқи ва Тошкент ўртасидаги ҳамкорликни сезиларли даражада кенгайтириш имконини берганини қўшимча қилди. «Биз ушбу шартномада барча илғор тажрибалар ва соҳаларни акс эттиришга ҳаракат қиламиз», — деди Питер Буриан.
Кенгайтирилган шериклик ва ҳамкорлик тўғрисидаги икки томонлама битим бўйича музокаралар 2019 йилнинг февралидан бошланган эди. Учта раунд (2020 йилнинг июль ва сентябрида ҳамда жорий йилнинг февралида) онлайн формат бўлиб ўтган.
Аввалроқ, Инвестициялар ва ташқи савдо вазирлиги матбуот хизмати КШҲБ 2021 йил якунига қадар имзоланиши мумкинлиги ҳақида хабар берган эди.
