Фарғона вилоятидаги «Ватанпарварлар» боғида «Хотира бор экан — миллат барҳаёт» сўзлари остида Вермахт аскарлари акс этган плакатлар сурати ижтимоий тармоқларда тарқалди. Фарғона вилояти ҳокимлиги ушбу ҳолатга муносабат билдирди.
Таъкидланишича, 9 май куни Фарғона шаҳрида Хотира ва қадрлаш куни ҳамда фашизм устидан қозонилган буюк Ғалабанинг 76 йиллиги катта тантана билан нишонланган.
Қайд этилишича, «Ватанпарварлар» боғи ҳудудига «Тасвирий ойина» ижодий уюшмаси Фарғона вилоят бўлимининг қўпол техник хатоси ва эътиборсизлиги натижасида «Хотира бор экан — миллат барҳаёт» сўзлари остида Вермахт аскарлари расми туширилган кўчма плакат ўрнатилган.
Бу ҳолат эса ўта ёқимсиз ҳолат бўлгани таъкидланди.
Ҳозирда вилоят ҳокимлиги томонидан ушбу масала юзасидан ўрганиш бошланган. Дастлабки суриштирувга кўра, интернетдан иккинчи жаҳон уруши даври билан оид расмларга қидирув бериб, «етарли билимсизлик» туфайли тасодифий расм олингани, плакат дизайнида фойдаланилгани маълум бўлган.
«Ким плакат макетини тайёрлаган, нега бу расмни танлаган, нега тасдиқлатилмаган ҳолда ўрнатилган, буларнинг бари батафсил ўрганиб чиқилади. Айбдорларга кескин чоралар кўрилади. Ҳозирда у кўчма плакат «Ватанпарварлар боғи»дан олиб ташланди, ўрнига иккинчи жаҳон урушида қаҳрамонлик кўрсатган ўзбек жангчилари тасвирланган баннер ўрнатилади», — дейилади хабарда.
