Назарбоев Қозоғистон халқи Ассамблеясини бошқариш ҳуқуқини Токаевга топширишга қарор қилди
Қозоғистон биринчи президенти Нурсултон Назарбоев Қозоғистон халқи Aссамблеясини (ҚХА) бошқариш ҳуқуқини амалдаги давлат раҳбари Қосим-Жомарт Токаевга топширишга қарор қилганини эълон қилди. «Мен ҚХАни умрбод бошқариш ҳуқуқига эгаман. Шу билан бирга, бир қатор ваколатлар мамлакат президентига юклатилган. Барча масалалар бир қўлда бўлиши керак. Мен ҚХАни бошқариш ҳуқуқимни президент Қосим-Жомарт Кемелевич Токаевга топширишга қарор қилдим», — деди Назарбоев 29-сессия йиғилиши пайтида. Токаев ўз навбатида Назарбоевга ҚХАнинг фахрий раиси бўлишни таклиф қилди. «Сизга, ҳурматли Нурсултон Aбишевич, ассамблеянинг фахрий раиси бўлиш ҳақидаги умумий таклифимизни қабул қилиш илтимоси билан мурожаат қиламан. Ушбу мақом сизнинг халқимиз ва давлатимиз олдидаги тарихий хизматларингиз туфайли ҳақли равишда сизга тегишли. Ишонаманки, барча Aссамблея аъзолари ушбу таклифни қўллаб-қувватлайди», — деди Токаев. — Қозоғистон биринчи президентининг веб-саҳифаси.
Қозоғистон халқи Ассамблеяси консультатив ва маслаҳат органи бўлиб, республикада яшовчи барча миллат ва халқлар вакилларини бирлаштиради. ҚХАни яратиш ғоясини 1992 йилда Нурсултон Назарбоев илгари сурган ва у унинг доимий раиси бўлган.
2019 йил 19 мартда Нурсултон Назарбоев республика телеканаллари жонли эфирида халққа мурожаат қилиб, президентлик ваколатини топширганини эълон қилган эди.
АҚШ Aфғонистондан қўшинларини олиб чиқиб кетмоқда, аммо мамлакатни тарк этмаяпти — AҚШ Давлат котиби
AҚШ Давлат котиби Энтони Блинкеннинг айтишича, Aфғонистондаги фуқаролар урушининг қайта бошланишидан ҳеч ким манфаатдор эмас, гарчи бу сценарий мумкин бўлса ҳам. Унинг таъкидлашича, қўшни давлатлар тинчликни сақлаб қолиш учун Aфғонистондаги таъсиридан фойдаланадими ёки йўқми деган қарорга келишлари керак. «Ҳеч ким Aфғонистондаги фуқаролар урушини тиклашдан манфаатдор эмас — на Aфғонистон халқи, на Aфғонистон ҳукумати ёки Толибон. Ва, албатта, Aфғонистонга қўшни давлатларнинг ҳеч бири. Сўнгги 20 йил ичида бир четда қолиб кетган қўшнилар, шу қаторда минтақадаги бошқа мамлакатлар тинчликни сақлаб қолиш учун ўз таъсиридан фойдаланишга ҳаракат қиладими ёки йўқми деган қарорга келишлари керак, — деди Энтони Блинкен. Унинг таъкидлашича, АҚШ Aфғонистондан қўшинларини олиб чиқиб кетмоқда, аммо мамлакатни тарк этмаяпти. АҚШ Давлат котиби, шунингдек, мамлакат Aфғонистонда AҚШга ишлаган афғонлар (таржимонлар, муҳандислар, маҳаллий шериклар, уларнинг оилалари — жами 18 минг киши) ва ўз ҳаётига тўғридан-тўғри таҳдид ҳис қилаётганлар махсус виза дастури асосида AҚШга кўчиб ўтишини таъминлашга ҳаракат қилаётганини таъкидлади. — Газета.uz
AҚШнинг Aфғонистон бўйича махсус вакили Залмай Халилзоднинг таъкидлашича, Толибонлар музокара жараёнига тўсқинлик қилса ва Aфғонистондаги ҳокимиятни эгаллаб олишга ҳаракат қилса, халқаро санкциялар ва изоляцияга дуч келади.
1 майдан бошлаб АҚШ Афғонистондан ўз ҳарбийларини олиб чиқишни бошлайди ва бу жараённи 11 сентябргача якунлашни режалаштирмоқда.
Кипр ҳукумати ноқонуний равишда 3,5 мингта «олтин паспорт» берган — махсус комиссия
Кипр ҳукумати «сармоя эвазига Европа Иттифоқи фуқаролиги» доирасида инвесторларнинг қариндошларига ноқонуний равишда 3,5 минг дона паспорт берган, дея ёзади АР махсус комиссия баёнотига таяниб. Комиссия Кипр ҳукумати 6779та «олтин паспорт»дан ярмидан кўпини инвесторларнинг вояга етган қариндошларига берилганлигини аниқлади. Таъкидланишича, бунга рухсат берувчи қонунлар мавжуд эмас. Хабарда айтилишича, бу ҳолатда Кипр ҳукумати қонунларни нотўғри талқин қилган. Қонуннинг яна бир нотўғри талқин қилиниши ҳукуматга хорижий ва маҳаллий компаниялар раҳбариятига паспорт беришга имкон берди, гарчи бу одамлар ўзлари мамлакат иқтисодиётига маблағ киритмаган бўлсалар ҳам. Комиссия хулосасига кўра, компания раҳбарларини инвестор деб ҳисоблаш мумкин эмас, чунки улар бошқарадиган компанияларга эгалик қилишмайди. Махсус комиссия, шунингдек, Ички ишлар ва Молия вазирликлари аризаларни қўриб чиқиш жараёнида хатоликка йўл қўйганини аниқлади. — Associated Press.
Ўтган йилнинг 1 ноябридан бошлаб Кипр «олтин паспорт» дастурини бекор қилган.
Россия Болтиқбўйи давлатлари ва Словакия дипломатларининг мамлакатдан чиқариб юборилиши ҳақида эълон қилди
Россия ўзаро муносабат тамойили асосида Литванинг Москвадаги элчихонасининг икки нафар ходимини, Эстония ва Латвия элчихоналарининг ҳар биридан бир нафардан ходимини мамлакатдан чиқариб юбормоқда, дея хабар берди Россия ТИВ. Уларга Россияни тарк этиш учун етти кун берилди. Шунингдек, Москвадаги Словакия элчихонасининг уч нафар ходими мамлакатдан чиқариб юборилади, уларга 5 майга қадар вақт берилди.
23 апрель куни Латвия, Литва, Эстония ташқи ишлар вазирликлари ҳамда Словакия Чехия билан бирдамлик сифатида Россия элчихоналари ходимларини мамлакатдан чиқариб юборишга қарор қилгани ҳақида хабар берган эдик. Жами бўлиб Россиянинг 7 нафар дипломати ушбу давлатлардан чиқариб юборилади — бир нафардан Латвия ва Эстониядан, икки нафари Литвадан ва уч нафари Словакиядан.
Словения пойтахтида ҳукумат истеъфоси учун оммавий митинг бўлиб ўтди
28 апрель куни кечқурун республика парламенти олдидаги майдонда Словения ҳукуматига қарши норозилик намойишида бир неча юз киши қатнашди. ТАССнинг ёзишича, йиғилганлар Вазирлар Маҳкамасини истеъфога чиқаришга ва Республика давлат мажлисига (парламентнинг қуйи палатасига) муддатидан олдин сайловлар ўтказишга чақиришган. Уларнинг аксарияти бош вазир Янеза Яншуни коррупция, коронавирус пандемияси ва аҳолининг фуқаролик ҳуқуқларини бузиш билан самарасиз курашда айблаган шиорлар ёзилган плакатларни ушлаб туришган. Словенияда амалдаги чекловларга қарамай, полиция намойишчиларни ҳибсга олмаган. — ТАСС.
Франция ҳарбийлари мамлакат президентини ирқий уруш хавфи ҳақида огоҳлантирди
Истеъфодаги француз генераллари ва зобитлари мамлакат президенти Эммануэль Макронга очиқ хат билан чиқишди, унда улар ирқий уруш ва давлат тўнтариши хавфи ҳақида огоҳлантирди. Бу ҳақда Интерфакс Valeurs actuelles’га таяниб хабар бермоқда. Ушбу мактубда юздан ортиқ франциялик истеъфодаги генерал ва зобитлар Франция конституциясига зид бўлган диний ақидапарастлардан келиб чиқадиган «тартиблар» фуқаролар урушига олиб келиши хавфи ҳақида огоҳлантирмоқда. Шунингдек, улар Макрон ҳаракатсиз қолса, давлат тўнтариши содир бўлиши мумкинлиги ҳақида огоҳлантирмоқда. «Кўриб турганимиздек, кечиктиришга вақт йўқ, акс ҳолда эртага ички уруш бу ўсиб бораётган бетартибликка чек қўяди ва сиз жавобгар бўладиган ўлимлар сони минглаб ҳисоблана бошлайди», дея хулоса қилди истеъфодаги ҳарбийлар. ОАВда эълон қилинган мурожаат ўта ўнг лидери Марин Ле Пен ҳамда мингга яқин фаол армия зобитлари ва аскарлари томонидан қўллаб-қувватланди, дея келтиради Интерфакс BBC News хабаридан. Қуролли Кучлар вазири Флоренс Парли, Қуролли Кучлар аъзоларига сиёсий ёки диний мавзуларда фикр билдириш тақиқланганлигини эслатди, дея ёзмоқда нашр. «Қоидабузарларга қарши санкцияларни қўллаш режалаштирилмоқда», — дея қўшимча қилди Парли. — Интерфакс.
