Ўзбекистон президенти Шавкат Мирзиёев 15 февраль куни Жиззах вилоятининг инвестиция лойиҳалари тақдимоти билан танишган эди. Тақдимотда жами 515 та лойиҳа ҳақида маълумот берилди. Лойиҳаларнинг умумий қиймати 35,5 трлн сўмни ташкил этади.
«Газета.uz» «Жиззах» эркин иқтисодий зонасида автомобиль соҳасида амалга ошириладиган учта лойиҳага эътибор қаратди.
ADM Jizzakh
Корхоналар ва ташкилотларнинг ягона давлат регистри (КТЯДР) маълумотларига кўра, 2020 йил январда рўйхатга олинган ADM Jizzakh автозаводининг ягона таъсисчиси Roodell тижорий автомобиль ва енгил транспорт чакана савдоси билан шуғулланади. Ўз навбатида, Roodell улушларига Мирбахром Асроров (33,4%), Дониёр Давлатёров (33,3%) ва Мурод-Мирза Шарипов (33,3%) эгалик қилади.
Тақдимотга кўра, 2020 йилда Roodell компаниясининг ADM Jizzakh заводида енгил автомобиллар ишлаб чиқаришнинг иккинчи босқичини амалга ошириш режалаштирилмоқда. Сентябрда мазкур майдончада Kia, сўнгра Lada ва Renault автомобиллари тақдимотлари ўтказилган эди.
Лойиҳа қиймати 700 млрд сўм, ишлаб чиқариш қуввати — 100 та автомобилни ташкил этади. 860 та ишчи ўрни очилиши кутилмоқда.
Корея Эксимбанки кредит маблағларини ажратади.
Roodell бош директори Дониёр Давлатёров «Газета.uz»га берган интервьюсида заводда биринчи босқичда 195 та операцияни амалга оширган ҳолда йирик узелли йиғиш услубида автомобиль йиғилишини маълум қилди. иккинчи босқичда, 2022 йил охиригача, пайвандлаш, кузовларни бўяш ва СKD-йиғиш цехларини ишга тушириш режалаштирилаётганини маълум қилган эди.
«Иккинчи босқичда биз бутунлай бошқа автомобилни чиқарамиз, ҳозирда у ҳеч қаерда йўқ. У МДҲда намойиш этилмаган. У Ўзбекистон ҳудудида бутун минтақа учун эксклюзив равишда ишлаб чиқариладиган янги KIA маҳсулоти бўлади… Бизнинг ҳисоб-китобларимизга кўра, у ҳамёнбоп автомобиль бўлиб, экспорт ҳам қилинади», — дея таъкидлади у.
Auto Motors Asia
КТЯДР маълумотларига кўра, Auto Motors Asia 2020 йил 25 февралда рўйхатга олинган. Асосий фаолият тури — моторли транспорт воситаларини ишлаб чиқариш. Ягона таъсисчи ва раҳбар — Элдор Абдурасулов.
Auto Motors Asia компанияси 2021 йилда Жиззахда микроавтобуслар, тижорий автомобиллар ва юк машиналарини ишлаб чиқаришни ўзлаштиришга тайёрланмоқда.
Ишлаб чиқариш қуввати йилига 27 мингта автомобилни ташкил этиб, 174,7 млрд сўм миқдорида сармоя киритилади. 500 та янги иш ўрни очилишини кутилмоқда.
Аввалроқ «Газета.uz» компаниянинг чет эллик ҳамкорлари Хитойнинг China Dong Feng Motor Industry ва Нebei Changan Automile компаниялари бўлиши кутилаётгани ҳақида ёзган эди.
Jizzax avtomobil zavodi![]()
Jizzax avtomobil zavodi 2017 йил 23 май куни рўйхатга олинган. Заводга «Ўзавтосаноат» томонидан тижорий техникалар ишлаб чиқарувчи корхоналарни бошқариш учун ташкил этган бошқарувчи компания — Uzauto Commercial Vehicles Management эгалик қилади.
Jizzax avtomobil zavodi 2021 йилда Volkswagen тижорий автомобилларини ишлаб чиқариш бўйича иккинчи лойиҳани амалга оширишни режалаштирмоқда.
Лойиҳавий қуввати йилига 20 мингта автомобилни, сармоя ҳажми — 1,44 трлн сўмни ташкил этади. 500 та янги иш ўрнини очиш режалаштирилмоқда.
Июль ойи охирида Ўзбекистонда биринчи Volkswagen дилерлик маркази очилиб, енгил Caddy тижорий автомобилларини сотиш бошланган эди.
Ўшанда «Фольксваген Груп Рус» бош директори Маркус Озегович Volkswagen Group яқин вақтларда ҳамкорликнинг навбатдаги босқичига ўтишини маълум қилган эди.
«Биз автомобилларимизни дунёнинг турли мамлакатларида сотамиз. Бироқ уларни ишлаб чиқарадиган мамлакатлар сони камроқ. Ва мен Ўзбекистон шу кузнинг ўзидаёқ бизнинг ишлаб чиқарувчи давлатлар рўйхатимизга кираётганидан бахтиёрман», — деган эди у.
Тақдимотга кўра, учта лойиҳага 99,5 млн доллар миқдорида хорижий инвестиция жалб қилинади. Маҳсулот ишлаб чиқариш ҳажми 22,2 трлн сўмни, бюджетга тушумлар — 2,5 трлн сўм, экспорт — 237 млн долларни ташкил этиши мумкин.
Бунинг учун «Жиззах» ЭИЗга зарур инфратузилмалар қурилиши учун 80 млрд сўм ажратиш режалаштирилмоқда.
Жиззах вилояти ҳокими Эргаш Солиев Москванинг бир қатор университетлари билан ҳамкорликда хусусий университет қурилаётганини маълум қилди. Бундан ташқари, ёшларнинг таклифларига асосланиб, автомобиль саноати ривожланиб бораётган Жиззахда Жиззах политехника институти билан ҳамкорликда Тошкентдаги Турин политехника университетининг факультетини очиш режалаштирилмоқда.
Аввалроқ Ўзбекистондаги бир қатор компаниялар 2021−2023 йилларда енгил автомобиллар, пикаплар, юк машиналари, минивэнлар ва бошқа автоларни ишлаб чиқариш ҳамда йиғишни йўлга қўйишни режалаштираётгани ҳақида ёзган эдик.
