Президентнинг 2021−2023 йилларга мўлжалланган Инвестиция дастурини амалга ошириш бўйича қарорига кўра, мамлакатда 7 та компания томонидан автомобиль ишлаб чиқарилиши кўзда тутилган.
«Navoi-Motors» ХК
Навоий вилояти Кармана туманида «Navoi-Motors» хусусий компаниясида пикаплар, кичик юк машиналари, минивен, йўлтанламас, электромобиль ҳамда тракторлар ишлаб чиқарилиши кўзда тутилган.
Компания йилига 12 мингта автомобиль ишлаб чиқариш қувватига эга бўлади. Лойиҳа 12 млн долларга баҳоланмоқда, шундан 6 млн доллари 2021 йилда сарфланиши режалаштирилган. Шунингдек, 100 та иш ўрни яратилиши кутилмоқда.
Aвстриянинг Parsalpine Management Gmbн компанияси, Navoi-Motors'га, шунингдек Navoi Agro Fertilizers ўғитлар ишлаб чиқаришга сармоя киритади.
«Манас авто-саноат» МЧЖ
Наманган вилоятидаги «Манас авто-саноат» компанияси Тўрақўрғон туманида йилига 3000 та юк машинасини ишлаб чиқаришни режалаштирган.
Лойиҳанинг умумий қиймати тахминан 10 млн долларни ташкил этади. Маълумотларга кўра, 220 та иш ўрни яратилиши кутилмоқда.
Туркиянинг Manas Savunma AS компанияси хорижий шерик сифатида кўрсатилган.
«Namangan changan motors» МЧЖ
Инвестиция дастурига Namangan Changan Motors автомобиль ишлаб чиқарувчиси ҳам киритилган. Бу ҳақда 2020 йилнинг июль ойида хабар берган эдик.
Эслатиб ўтамиз, «Наманган» эркин иқтисодий зонасида Хитойнинг Сhangan бренди остида кичик юк машиналарини ишлаб чиқарилишига тайёргарлик кўриляпти. Кичик юк машиналарини ишлаб чиқариш «Хориждаги ватандошлар» лойиҳаси доирасида йўлга қўйилади. Ишлаб чиқаришга жами 5,8 млн доллар сармоя киритилди. Булардан сўнгги 10 йилдан бери БААда яшовчи наманганлик тадбиркор Жобирхон Ҳамидовнинг 800 минг доллари, Mustafa Rent A Car L.L.C томонидан 2 млн долларлик хорижий инвестиция ва 3 млн доллар миқдоридаги банк кредити. Улардан 5 млн долларини 2021 йилда ўзлаштириш режалаштирилган.
Биринчи босқичда Namangan Сhangan Motors компанияси йилига 1−1,5 тонна юк кўтариш қувватига эга бўлган 1800 та кичик юк машинасини ишлаб чиқаради, шунингдек 140 кишини иш билан таъминлайди. Биринчи юк машиналар 2021 йилнинг биринчи чорагида сотувга чиқиши кутилмоқда.
«ADM Jizzakh» МЧЖ
Жиззакда Lada ва Renault автомобилларини ишлаб чиқаришни йўлга қўйиш режалаштирилган. Aвтотранспорт воситалари «Жиззах» эркин иқтисодий зонасидаги Roodell’нинг ADM-Jizzakh заводида йиғилиши кутилмоқда. Эслатиб ўтамиз, Kia автомобилларининг ишлаб чиқарилиши сентябрь ойида эълон қилинган эди.
Инвестиция дастурига кўра, лойиҳа қуввати йилига 100 минг дона автомобилни ташкил қилади. Лойиҳа 60,9 млн долларга баҳоланмоқда, шундан 33,3 млн долларини 2021 йилда ўзлаштириш режалаштирилган.
Компаниянинг хорижий ҳамкори сифатида Кореянинг Эксимбанки кўрсатилган.
«Auto Motors Asia» МЧЖ
Auto Motors Asia Жиззахда кроссоверлар, юк машиналари ва микроавтобусларни ишлаб чиқаришни ўзлаштиришга тайёрланмоқда.
Лойиҳа қуввати йилига 27 минг дона автомобилни ташкил этади. Инвестициялар ҳажми эса 16,2 млн доллар миқдорида режалаштирилган.
Хорижий шериклар сифатида Хитойнинг China Dong Feng Motor Industry ва Нebei Changan Automile компаниялари кўрсатилган.
«Abbos-Eco Agro» МЧЖ
Сурхондарё вилоятида «Abbos-Eco Agro» компанияси Денов туманида енгил автомобиллар, микроавтобуслар ва кичик юк машиналарини ишлаб чиқаришни йўлга қўйишни режалаштирмоқда.
Лойиҳа 30 млн долларга баҳоланмоқда. Завод йилига 10 минг дона автомобиль ишлаб чиқариш қувватига эга.
Хорижий шерик сифатида Хитойнинг Beijing Automotive Group (BAIC Group) холдинги кўрсатилган.
«Hyundai Motor Uz Namangan» МЧЖ
Шунингдек, инвестиция дастурига Нyundai Motors ва Evergreen Motors (Корея) билан ҳамкорликда Наманган вилоятида йилига 3000 та тижорат юк машиналарини ишлаб чиқарадиган Нyundai Motor Uz Namangan компанияси киритилган.
2018 йил ноябрь ойида Ўзбекистон ва Корея Республикаси ўртасида Наманган вилоятида Hyundai автомобиль заводини қуриш тўғрисида икки томонлама битим имзоланган эди. Шунингдек, заводнинг дастлабки маҳсулотлари 2019 йил сентябрь ойида чиқарилиши ва йиллик ишлаб чиқариш ҳажми 2500 та кичик юк машиналари, микроавтобуслар ва автобусларни ташкил этиши ҳақида хабар берилган эди. Aммо баъзи сабабларга кўра қурилиш ишлари тўхтатилган.
Наманган вилояти ҳокими в.б. Шавкат Aбдураззоқов ўтган йилнинг декабрь ойида Ўзбекистон томони Наманган шаҳрида заводни қуриш бўйича барча мажбуриятларни бажарганини айтган эди.
«Жанубий Кореялик инвесторлар талаби асосида эркин иқтисодий зона ҳудудидан жой ажратилди. Ҳамкорлик шартномаси имзоланди. Фақат Жанубий Корея томонидан таъсисчилар таркиби ҳамда пандемия бошланиб кетгани учун уларнинг фаолият географиясидаги ўзгаришлар сабабли бу борадаги ишлар тўхтаб қолди.», — дея унинг сўзларини келтирган ЎзA.
Вилоят раҳбарининг сўзларига кўра, шериклар янги ҳамкорлик шартномасини таклиф қилишди.
«Шу масалада ҳозиргача икки марта музокаралар ўтказдик. Кореяликлар томонидан ҳамкорлик бўйича янги шартнома таклиф этилди. Қўшимча инвестициялар киритиш, корхонани ривожлантиришга қаратилган келишувни имзоладик. Эндиликда Жанубий Корея томони имзолашини кутмоқдамиз. Мақсадимиз — лойиҳани ўз ҳолига ташлаб қўймасдан, юргизишдир. Ҳозирги кунда ҳамкоримиз томонидан шартномани кўриб чиқилишини кутяпмиз. Бир ой муддатимиз бор, улардан жавобни кутишимиз керак», — деди Шавкат Aбдураззоқов.
Шавкат Мирзиёев 29 декабрь куни парламентга йўллаган мурожаатномасида «автомобилсозлик соҳасида соғлом рақобатни ривожлантириш ва соҳадаги корхоналар учун тенг шароитлар яратиш туфайли» ишлаб чиқарувчилар сони кўпайтирилишини таъкидлади.
