Президент Шавкат Мирзиёев Наманганга ташрифи давомида Янгиқўрғон туманида жойлашган БААнинг «Sura General investment» корхонаси раҳбари Абдулбария Айман билан ҳам суҳбатлашди. Бу ҳақда «Газета.uz» мухбири хабар бермоқда.
Давлат раҳбари мулоқот давомида тадбиркорга ўз миннатдорчилигини билдирди. «БАА билан дўстлик кўпригимизга жуда катта ҳисса қўшганингиздан миннатдорман», — деди президент.
Давлат раҳбари Абу Даби Амирлиги валиаҳди Шайх Муҳаммад бин Зоид Ол Наҳаён ҳамда БАА бош вазирининг ўринбосари, президент ишлари бўйича вазир Шайх Мансур бин Зоид Ол Наҳаён билан суҳбатларда улар Ўзбекистон мева-сабзавотларига ҳавас билан қарашини билдирганини қайд этди.
Фото: корхона раҳбари Абдулбария Айман
Шавкат Мирзиёев инвестордан «Янгиқўрғонга келиб, бу баҳаво жойларда ишлаш, Ўзбекистондаги шароитлар маъқул бўлаяптими», — деб сўради.
Инвестор вазирлардан тортиб, ҳокимларгача қўллаб-қувватлаётганини айтиб, ўзини миннатдорчилигини билдирди. Келгусида нафақат қишлоқ хўжалиги балки бошқа соҳаларда ҳам фаолият юритишни ният қилганини, бунинг учун шарт-шароитларни ўрганаётганини айтди. Қолаверса, БААдан яна кўпчилик инвесторлар қизиқиш билдираётганини маълум қилди.
«Бу ердаги ўз тажрибамдан келиб чиққан ҳолда, биз БААдаги бошқа тадбиркорларга ҳам буни тарғиб қилаяпмиз. Май ойида инвесторларнинг катта гуруҳини олиб келишни режалаштираяпман, улар пандемияни сал юмшашини кутаяпти. Йил охиригача амирликларнинг Ўзбекистондаги қишлоқ хўжалигига инвестицияси ҳажми жуда катта бўлади», — деди инвестор.
Ўз навбатида президент буни назоратга олишини айтиб, қишлоқ хўжалиги вазири Жамшид Ходжаевга у билан мулоқот қилиши лозимлигини таъкидлади. Ходжаев инвестор қўшимча 300 гектар майдонда, кейинчалик эса яна минг гектарда боғ ташкил қилиш ниятида эканини қайд этди.
Бундан ташқари, қайта ишлаш, музлатиш, қадоқлаб, БААга жўнатиш режа қилинганини айтди. Қолаверса, лаборатория очиб, амирлик талаблари бўйича сертификатлаш тизимини ҳам йўлга қўйишини маълум қилган.
