АҚШ ўзининг Беларусь ҳукуматига қарши чекловлар рўйхатига Марказий сайлов комиссияси, Беларусь ички ишлар вазири Геннадий Казакевич, «Альфа» КГБ махсус кучлари ва Минск шаҳар мобиль оператив отрядини (ОМОН) ҳам киритди, дея хабар берди TUT.BY.
Санкциялар ушбу шахслар ва тузилмаларнинг «президентлик сайловларидаги фирибгарлик ва кейинчалик тинч демократик норозиликларни куч ишлатган ҳолда бостиришда» иштирок этганлик ёки алоқадорликлари учун қўлланади.
Эслатиб ўтамиз, 9 август куни Беларусда бўлиб ўтган президентлик сайловларидан сўнг мамлакатда оммавий норозиликлар бошланган бўлиб, у ҳозиргача давом этмоқда. Октябрь ойида АҚШ Беларуснинг 8 нафар расмий шахсларига, шу жумладан, ўша пайтдаги Беларусь ички ишлар вазири Юрий Караевга нисбатан санкциялар эълон қилган эди.
