Google ходимлари 2021 йилнинг сентябрь ойигача уйдан туриб ишлайди
Google компанияси коронавирус тарқалиши сабабли ходимларнинг офисларга ишлашга қайтишини 2021 йилнинг июлидан сентябригача кечиктирди. Маълумотларга кўра, компания «мослашувчан иш ҳафтаси»ни синовдан ўтказмоқчи, бу компания биносида ҳафтасига камида уч кун ишлашни ўз ичига олишини англатади. «Биз мослашувчан иш моделлари самарадорликни, ҳамкорлик ва фаровонликни оширишга олиб келади, деган ғояни синовдан ўтказмоқдамиз», — деди компания директори Сундар Пичаи. Унинг гапларига кўра, бу пайтгача бирон бир йирик компания ҳали тўлиқ гибрид иш моделини яратмаган. — NBC.
Францияда иқлимни муҳофаза қилиш тўғрисидаги моддани Конституцияга киритиш учун референдум ўтказилади
Францияда конституцияга иқлимни муҳофаза қилиш бўйича янги мажбуриятларни киритиш учун референдум ўтказилади. «Биз биологик хилма-хиллик, атроф-муҳит ва иқлим ўзгариши муаммосини ҳал қилиш ғояларига тааллуқли конституциявий ислоҳотни амалга оширишимиз керак. Ушбу масала жуда мураккаб, аммо биз 10, 15, 20 йил олдинга қарашимиз керак», — дейди мамлакат президенти Макрон. Бу масала Миллий мажлис, сўнгра Сенат орқали ўтиб, кейин эса референдум йўли билан ҳал бўлиши таъкидланди. Макрон Франция ўз иқтисодий моделида экологияга кўпроқ жой бериши кераклигини қўшимча қилди. Референдумнинг 2021 йилда бўлиб ўтиши кутилмоқда. — BFMTV.
AҚШ Туркиянинг мудофаа саноати идорасига қарши санкциялар жорий қилди
AҚШ ҳукумати «давлат рақибларига қарши санкциялар билан курашиш тўғрисидаги қонун» (CAATSA) доирасида Туркия мудофаа саноати бошқармаси, унинг раҳбари Исмоил Демир ва Туркиянинг яна уч фуқароси — Фарук Йигит, Мустафо Aлпер Дениз ва Серҳат Генчўғлига чекловлар қўйди. Фарук Йигит бўлим бошлиғининг ўринбосари, қолган иккитаси эса ҳаво ҳужумидан мудофаа билан боғлиқ ихтисослаштирилган бўлимларнинг бошлиқлари. Таъкидланишича, санкциялар CAATSA доирасида кўзда тутилган бешта бандга нисбатан қўлланилган. Виза санкциялари ва бўлимнинг рўйхатдаги вакилларининг активларини музлатишдан ташқари, AҚШ экспорт лицензиялари ҳамда ҳар қандай товарлар ва технологияларни Туркия мудофаа саноатига ўтказиш учун рухсатномалар беришга ҳам тақиқ ўрнатилган. AҚШ молия институтларига ушбу бўлим учун йилига 10 миллион доллардан ошадиган кредитлар бериш тақиқланади. AҚШ экспорт-импорт банкининг менежмент мақсадида экспортга ёрдам беришига йўл қўйилмайди. Бундан ташқари, АҚШ халқаро молия институтлари томонидан Туркия мудофаа саноатидан фойда кўрган кредитлар берилишига қаршилик кўрсатади. — АҚШ ҳукуматининг расмий сайти.
Пандемия бошланганидан буён БМТ бош котиби биринчи ташрифни амалга оширади
БМТ бош котиби Aнтониу Гутерриш 16 декабрь куни Германияга ташриф буюради, бу унинг март ойининг бошидан бери биринчи расмий ташрифи бўлади. «Бош котиб чоршанба куни Берлинга жўнаб кетади. У жума куни эрталаб Германия парламентида нутқ сўзлайди ва канцлер Aнгела Меркель, президент Франк-Вальтер Штайнмайер ва ташқи ишлар вазири Хайко Маас билан учрашади», — дейди БМТ бош котибининг расмий вакили Стефан Дюжаррик. Маълумотларга кўра, Гутерриш анъанавий равишда, яъни тижорат рейси билан сафар қилади. Бош котиб ва унинг делегацияси аъзолари парвоздан олдин коронавирусга тест топширишади. Улар Нью-Йоркга қайтганларидан сўнг яна бир бор коронавирусга тест топшириб, уч кунлик карантинга олинади. — ТАСС.
Японияликлар 2021 йилда Токиода бўлиб ўтадиган Олимпиадага қарши чиқишмоқда
Япония аҳолиси 2021 йилда Токио шаҳрида бўлиб ўтадиган Олимпия ойинларига қарши чиқишмоқда. Респондентларнинг 27 фоизи ўйинларни ёқламоқда, деярли учдан бири (32 фоиз) қарши чиқишмоқда, қолган 31 фоизи эса Олимпиада бошқа вақтга ўтказилиши керак деб ҳисоблайди. Мазкур сўровнома 11−13 декабрь кунлари 2,1 минг киши (18 ёшдан катта) орасида ўтказилди. — NHK.
