2 декабрь куни Ўзбекистон президенти Шавкат Мирзиёев мамлакатда амалий ташриф билан бўлиб турган Россия Федерацияси президенти Администрацияси раҳбарининг ўринбосари Дмитрий Козак бошчилигидаги делегацияни қабул қилди. Бу ҳақда президент матбуот хизмати хабар бермоқда.
Давлат раҳбари олий даражадаги самарали мулоқот туфайли Ўзбекистон-Россия кўп қиррали ҳамкорлиги кейинги йилларда жадал суръат билан ривожланаётгани, стратегик шериклик ва иттифоқчилик муносабатлари мустаҳкамланиб бораётганини катта мамнуният билан қайд этди.
Дмитрий Козак Ўзбекистон президентига самимий қабул учун миннатдорлик билдириб, Россия президенти Владимир Путиннинг саломи ва энг эзгу тилакларини етказди.
Учрашувда бўлажак икки томонлама ва кўп томонлама форматдаги учрашувларга тайёргарлик кўриш ва уларни ўтказиш масалалари кўриб чиқилди. Ушбу тадбирлар кун тартибини аниқ амалий мазмун билан бойитишга алоҳида эътибор қаратилди. Халқаро сиёсатнинг айрим жиҳатлари юзасидан ҳам фикр алмашилди.
Аввалроқ, «Газета.uz» 30 ноябрь куни Шавкат Мирзиёев ва Владимир Путин телефон орқали мулоқотда Ўзбекистон раислигидаги декабрда ўтадиган МДҲ саммитига тайёргарлик кўриш масаласига алоҳида эътибор қаратишгани ҳақида ёзган эди. Ўшанда икки давлат раҳбарлари коронавирус инфекцияси тарқалишига қарши курашиш, жумладан, Россия вакцинасидан фойдаланиш муаммоларига ҳам алоҳида эътибор қаратишган эди.
