Юқори тезликда ҳаракатланадиган электроскутерларни рўйхатдан ўтказиш мажбурий ҳолга айланди. Бу ҳақда тегишли ҳукумат қарори қабул қилинди.
«ДЙҲХХ органларида двигатели 50 ва ундан ортиқ куб.см иш ҳажмига эга бўлган ёки конструкциявий тезлиги соатига 50 ва ундан ортиқ километр бўлган автотранспорт воситалари, электродвигателининг қуватти 4 кВт ва ундан ортиқ ёки соатига 40 ва ундан юқори тезликка эга бўлган электромобиллар (электромотоцикллар, электроскутерлар ва бошқалар), шунингдек, тиркама ва ярим тиркамалар давлат рўйхатидан ўтказилади», — дейилади ҳукумат қарорида.
Электроскутерларнинг ўртача тезлиги 25−30 км/с ни ташкил қилади, лекин максимал тезлик нафақат 40 км/с, балки 60 км/с ва ҳатто 75 км/с этиши мумкин. Бундай скутерлар Ўзбекистон бозорида мавжуд ва техник хусусиятларига қараб 200 дан 1700 долларгача бўлган нархларда таклиф этилади.
