Тошкент вилояти прокуратураси томонидан Тошкент вилояти Паркент тумани ҳокимлиги томонидан Captiva русумли автомашинани сотиб олишда қонун бузилиши ҳолатлари аниқланди, дея хабар берди Коррупцияга қарши кураш агентлиги матбуот хизмати.
14 сентябрь куни давлат харидлари сайтида Паркент тумани ҳокимлиги захира фонди маблағларидан фойдаланган ҳолда 2018 йилги Captiva-2 (2018 йил 10 сентябрдан бошлаб ушбу моделни ишлаб чиқариш Ўзбекистонда тўхтатилган) 260 млн сўмга сотиб олингани тўғрисида маълумот пайдо бўлди. Автомобиль MEGA KARER шағал ва қум карьерларини ишлаб чиқариш компаниясидан сотиб олинган. МЧЖ таъсисчилари қаторида туман ҳокими Нигмат Исроилович Мухамедовнинг ўғли Сардор Нигматович Исроилов (34%) ҳам бор.
Ўшанда Тошкент вилояти ҳокимлиги матбуот хизмати Паркент тумани тоғлар ва тоғолди ҳудудларидан иборат бўлгани учун 2019 йилда туман маъмурияти Captiva русумли автомашина сотиб олишни режалаштирганини маълу қилган эди.
«Бироқ ўша пайтда вилоят бюджетида маблағ етишмаслиги сабабли ҳокимнинг ўғли, MEGA KARER МЧЖ асосчиларидан бири машинани фойдаланиш учун отасига топширган», — дейилади хабарда.
Коррупцияга қарши курашиш агентлиги вазиятни ўрганиб чиқиб, терговга қадар текшириш учун Бош прокуратурага сўров юборди. Ушбу ҳолат бўйича прокуратура Паркент тумани ҳокимининг ҳаракатларини терговга қадар текширувдан ўтказди.
Текширув давомида «Давлат харидлари тўғрисида"ги қонун талаблари бузилгани, хусусан, автомобиль сотиб олишда манфаатлар тўқнашуви аниқланди. Натижада туман ҳокимининг автомобиль сотиб олиш тўғрисидаги буйруғи бекор қилинди ва MEGA KARER МЧЖ 260 млн сўмни ҳокимият ҳисоб рақамига қайтариб берди.
Тошкент вилояти прокуратураси терговга қадар текшириш ишларини давом эттирмоқда.
