Тошкент ҳокими Жаҳонгир Ортиқхўжаев карантин талаблари кучайтирилгани сабабли пойтахт аҳолисига мурожаат билан чиқиб, уларни бепорволикка йўл қўймасликка, зарурат бўлмаганда кўчага чиқмасликка, жамоа бўлиб йиғилмасликка ва онлайн хизматлардан унумли фойдаланишга чақирди.
Ўз мурожаатида ҳоким сўнгги ойлар давомида Тошкент шаҳрида карантин талаблари юмшатилиши аҳоли томонидан карантин талабларига зид бўлган ҳаракатлар кўпайиб, бунинг оқибатида охирги ўн кунда пойтахтда касалликка чалиниш ҳолатлари кескин ошиб, кунлик 30−40 тадан ўртача 150−200 тагача кўпайгани, ўлим ҳолатлари ҳам ортганини таъкидлаб ўтди.
«Коронавирус менга таъсир қилмайди, мендан узоқда деган фикрда бўлсак, адашамиз. Хавф ортда қолиши учун ҳаммамиз санитария-гигиена талабларига тўлиқ амал қилишимиз, бепорволикка йўл қўймаслигимиз, зарурат бўлмаганда кўчага чиқмаслигимиз, жамоа бўлиб йиғилмаслигимиз, аввалдан мўлжалланган жамоавий тадбирларни ортга суришимиз лозим. Бугун аксарият хизматлар, ҳатто савдо-сотиқ ҳам онлайн йўлга қўйилган бўлиб, ҳар биримиз ундан унумли фойдаланишимиз зарур», — деди у.
Шунингдек, Жаҳонгир Ортиқхўжаев 10 июлдан уй шароитида даволанаётган беморлар ҳамда карантинга олинган шахсларга тиббий маслаҳат ҳамда ахборот беришга қаратилган туну кун узлуксиз фаолият кўрсатувчи 1105 қисқа рақамли Call-маркази фаолияти йўлга қўйилаётганини маълум қилди. Шу билан бир қаторда, уй шароитида даволанаётган беморлар ҳамда карантинга олинган шахсларга жойига чиққан ҳолда тиббий ёрдам кўрсатишга ихтисослашган мобил гуруҳлар ташкил этилади.
«Саломатлигингизда бирор нохушлик ва касаллик аломатларини ҳис қилганингизда бефарқ бўлманг, дарҳол шифокорларга мурожаат қилинг ва назоратда бўлинг, ўзингизни яккаланг ва зарур муолажаларни ўз вақтида кўринг. Коронавирусни жамиятнинг бирлиги, жипслиги ва бу борада белгиланган барча қоидаларга риоя қилиши билангина енгишимиз мумкин», — дея таъкидлади Тошкент ҳокими.
