Халқаро валюта жамғармаси (ХВЖ) 2020 йилда жаҳон ялпи ички маҳсулотининг 4,9 фоизга тушишини кутмоқда, бу ташкилотнинг апрель ойидаги прогнозидан 1,9 фоизга пастроқ.
«COVID-19 пандемияси 2020 йилнинг биринчи ярмида жаҳон иқтисодий фаолиятига кутилганидан кўра кўпроқ салбий таъсир кўрсатди ва прогноз қилинишича, тикланиш аввал тахмин қилинганидан кўра босқичма-босқич амалга оширилади», — дейилади ташкилот ҳисоботида.
Халқаро валюта фонди 2021 йилда дунё бўйича ўсиш прогнозини ҳам пасайтирди — 5,4%. Бу кўрсаткич апрель ойида 5,8 фоиз этиб прогноз қилинганди.
Қайд этилишича, даромади паст бўлган уй хўжаликлари жуда қаттиқ салбий таъсир кўрмоқда, бу 1990 йиллардан бери дунёда ўта қашшоқлик даражасини камайтиришга эришилган ютуқларни хавф остига қўймоқда.
ХВЖ дунё бўйлаб ҳукуматларни соғлиқни сақлаш тизимини тегишли ресурслар билан таъминлашга чорламоқда. Тавсия инфекциянинг энг юқори даражасидан ўтиб бўлган мамлакатлар учун ҳам тегишли.
«Ўз-ўзини яккалаш режими зарур бўлган мамлакатларда иқтисодиёт соҳасида амалга оширилаётган сиёсий чоралар иқтисодий фаолият чекловларига дучор бўлган компанияларни жиддий ва мақсадли қўллаб-қувватлаш орқали уй хўжаликларининг ўз даромадларини йўқотишини камайтиришда давом этиши керак», дея таъкидланади ҳисоботда.
Иқтисодиёт қайта тикланаётган мамлакатларда тикланиш бошланганидан жорий этилган мақсадли ёрдамни тўхтатиш тавсия этилди. Унинг ўрнига, ушбу мамлакатларнинг «иқтисодиёти очилиши билан сиёсий чораларнинг асосий йўналиши тикланишни ривожлантиришга йўналтирилиши» мақсадга мувофиқ, деб ҳисоблайди ХВЖ.
Манба: ХВЖ
Эслатиб ўтамиз, Халқаро валюта жамғармаси апрель ойида тақдим этган ҳисоботига кўра, ташкилот Ўзбекистон ялпи ички маҳсулоти 1,8 фоизгача пасайишини прогноз қилганди. Шу билан бирга, 2021 йилда эса бу кўрсаткич 7 фоизгача тикланиши тахмин қилинган эди.
