Янги Зеландияда коронавирус билан касалланган беъморлар қолмагани ва чекловларсиз ҳаётга қайтилаётгани эълон қилинди, дея хабар берди Reuters. Мамлакатда сўнгги 17 кун ичида коронавирус бўйича янги ҳолатлар кузатилмаган ва 8 июнь куни Янги Зеландияда касаллик қайд этилган охирги беморнинг ҳам тузалгани маълум қилинди.
8 июнь куни бош вазир Ясинда Ардерн Янги Зеландияда коронавирус тарқалишини тўхтатишга эришилгани ва чегара назоратидан ташқари барча чекловлар бекор қилинишини айтди. Унинг таъкидлашича, эндиликда хусусий ва жамоавий тадбирлар, чакана савдо, меҳмонхона бизнеси, шунингдек, бурча турдаги жамоат транспортларининг ҳеч қандай чекловларсиз ишга туширилишига рухсат берилади.
Шунингдек, соғлиқни сақлаш вазирлиги бу ҳали мамлакатда касаллик тўлиқ йўқ қилинганини англатмаслигини, фақатгина касалликнинг тарқалиш занжирини тўхтата олишга эришилганини маълум қилди.
Янги Зеландияда карантин 75 кун давом этди ва мамлакатда умумий коронавирус бўйича касалланганлар сони 1154 та бўлиб, 22 та ўлим ҳолати кузатилган.
