Microsoft компанияси Windows 10 операцион тизими янгиланганини маълум қилди. Операцион тизимнинг 2020 йил май ойидаги талқинини «Центр обновления Windows» («Windows янгилаш маркази») бўлимидан ўрнатиш мумкин.
Бироқ янги талқин носозликлардан ҳоли бўлиши учун бу сафар автоматик тарзда ўрнатилмайди. Фойдаланувчилар «Проверить наличие обновлений» («Янгилаш мавжудлигини текшириш») тугмасини босиб, уни ўзлари мустақил ўрнатиши керак бўлади.
Windows 10 нинг янги версиясида нафақат носозлик ва хатолар тузатилди, балки қўшимча функциялар ҳам киритилди.
Тизимни онлайн янгилаш
Булутли янгиланишга камида 4 ГБ сарфланиши хақида огоҳлантириш. Фото: vc.ru
Энди янгиланишларни нафақат USB-қурилма, диск ёки резерв хотирадан, балки тўғридан-тўғри онлайн юклаш ҳам мумкин. Тизим компьютерда қайси талқин ўрнатилганини инобатга олиб, янги версияларни онлайн тарзда ўрнатади. Аввал USB-хотиралардан фойдаланганлар учун эса тизимни тиклаш осонлашади.
Қидирув тизимининг оптималлашуви
Windows 10 нинг янги талқинида индексациянинг диск ва процессорларга бўлган босими камайтирилган. Индексация — операцион тизим компьютерда жойлашган файлларни белгилаб, излаш жараёнини тезлаштириш учун керак бўлади. Бу жараённи китоб хатчўплари билан тенглаштириш мумкин.
Файллар индексацияси алгоритми янги версияда тезроқ ишлайди: тизим ва дисклар оғир босимда ишлаётган вақтда индексация қўшимча оғирлик яратмайди. Фойдаланувчи одатда файл сақланмайдиган жойларни тизим излаш вақтида инкор қилади: бу операцион тизимнинг ички жилдлари, дастурий таъминотнинг файллари жойлашган бўлимлар бўлиши мумкин.
Cortana овозли ёрдамчиси
Microsoft овозли ёрдамчиси энди алоҳида дастур бўлди. Бунгача у тизимнинг бир қисми бўлиб, уни алоҳида янгилашнинг иложи йўқ эди. Энди бунга ҳожат йўқ ҳамда уни Edge браузери ва «Почта» каби Microsoft Store орқали алоҳида янгилаш мумкин.
Шу билан бирга, унинг функцияси ҳам кучайтирилди. «Яндекс Алиса» ва «Google Assistant"ларнинг стандарт саналмиш мусиқа бошқаруви, «ақлли уй» ва кўшимча имкониятлари Cortana дастурида ҳанузгача мавжуд, фақат бу сафар Microsoft компанияси самарадорлик ва тайм-менежментга кўпроқ эътибор қаратди: эслатмалар, тақвимдаги вазифаларни бошқариш ва иш билан боғлиқ бошқа қўшимчалар.
Cortana Microsoft 365 дастурига ҳам ўрнатилди. Видео: Microsoft 365
Янгиланишларни бошқариш ва юклаш тезлигини созлаш
Эндиликда «Центр обновления Windows («Windows янгилаш маркази») бўлимидаги барча муҳим бўлмаган янги компонентлар ва айрим файллар «Посмотреть необязательные обновления"(«Ихтиёрий янгиланишларни кўриш») саҳифасида йиғилади, фойдаланувчилар эса қайсиларини ўрнатишни ўзлари танлашади. Аввал бу функциянинг бўлмаганлиги кераксиз компонентларнинг сўровсиз ўрнатилишига олиб келиб, фойдаланувчиларга ноқулайликлар туғдирган.
Шунингдек, фойдаланувчилар янгиланишларнинг юкланиш тезлигини ҳам ўзлари созлаши мумкин. Бу «Параметры» («Созламалар») → «Обновление и безопасность"(«Янгиланиш ва хавфсизлик») → «Оптимизация доставки» («Юклаш созламаларини оптималлаштириш») → «Дополнительные параметры» («Қўшимча созламалар») бўлимида жойлашган бўлиб, керакли қийматни аниқ (мегабайт/сония) ёки тармоқ умумий тезлигининг фоизида ўрнатиш мумкин.
Бошқа кичик янгиланишлар
«Состояние сети» («Алоқа ҳолати») саҳифаси янгиланди: энди у ерда тармоқлар ва интернет ҳақида кўпроқ маълумот бор, масалан, сарфланган трафик миқдори;
«Диспетчер задач» («Вазифалар диспетчери») иловасининг «Производительность» («Самарадорлик») бўлимида график картанинг (видео-графика платаси) ҳарорати ва маълумот сақлаш қурилмасининг турини кўриш мумкин: HDD («hard disk drive — қаттиқ диск юритувчи») ёки SSD («solid-state drive — қаттиқ қобиқли диск»).
WordPad, Paint ва «Блокнот» энди Windows тизимининг стандарт компоненти эмас. Аввал уларни ўчириш имконияти бўлмаган бўлса, энди ўчириб ташлаб, зарур бўлса «Дополнительные компоненты» саҳифасидан қайта ўрнатиш мумкин;
«Управление глазами» («Кўз билан бошқариш») функцияси имконияти чекланган одамлар учун махсус қурилма ёрдамида файл ва ёрлиқларни бошқариш қўшимчасига эга бўлди;
«Win+Tab» тугмалар комбинацияси ёрдамида чақириладиган «Виртуальные рабочие столы» («Виртуал иш столлари») функцияси эндиликда иш столларининг номини ўзгартириш имконини беради, уларнинг ҳолати эса компьютер ўчиб-ёнганда ҳам сақланиб қолади.
Янги версияни ўрнатишга шошилманг
Microsoft компанияси агар янгиланишлар носозликлар сабабли автоматик тарзда ўрнатилмаса, уларни «мажбурлаб» ўрнатмасликни маслаҳат берди. Ҳозирда рўйхатда 11 та носозлик мавжуд бўлиб, уларнинг аксарияти компьютернинг ички ускуналари билан боғлиқ: Bluetooth-уланиш орқали биттадан ортиқ қурилма улана олмаслиги бир вақтнинг ўзида симсиз клавиатура, компьютер сичқончаси ва қулоқчинлардан фойдаланадиган фойдаланувчиларга муаммо туғдиради. Аудиоқурилмаларнинг маҳсус дастур-драйверлари билан юзага келган муаммо компьютерни «кўк экран» критик ҳолатига олиб келади.
Windows 10 операцион тизимида критик хато ҳақида хабар берувчи"кўк экран". Фото: Ferra.ru
Видеоўйинлар ишқибозларини ҳам бу муаммо четлаб ўтмади: агар операцион тизимда GameInput технологияси ишлатилган ўйин ва дастурлар бўлса, компания янги версияни ўрнатмасликни маслаҳат беради. Сабаби янгиланишдан сўнг «ўйин ва дастурлар ҳамда компьютер сичқончаси орасида алоқа узулиб қолади», деб таъкидлайди Microsoft
Агар фойдаланувчининг компьютерида рўйхатда келтириб ўтилган носозликлардан бирортаси мавжуд бўлса, улар бартараф этилмагунча, Windows 10 тизими автоматик тарзда янгиланмайди.
