Google компанияси Ўзбекистонда қўшилган қиймат солиғини (ҚҚС) тўлашни бошлади. Бу ҳақда Давлат солиқ кўмитанинг матбуот хизмати хабар берди.
Хабарга кўра, Ўзбекистонда бундай компанияларни рўйхатга олиш учун Давлат солиқ қўмитаси томонидан махсус хизмат — Интернет-компанияларнинг ҚҚС-офиси — http://tax.uz яратилди.
Давлат солиқ қўмита маълум қилишича, 24 апрель кунига қадар мазкур ҚҚС-офис орқали Ўзбекистонда 9 та хорижий компаниялар ихтиёрий солиқ тўловчи сифатида рўйхатдан ўтди.
Улар:
— Google Commerce Limited;
— Google Ireland Limited;
— Google Voice Inc;
— Apple Distribution International Limited;
— Netflix International B.V.;
— Samsung Electronics Co., Ltd.;
— Сleverbridge AG;
— Xsolla (USA), Inc.;
— Activision Blizzard International BV
Маълум қилинишича, ҚҚС бўйича биринчи тўлов «Google Commerce Limited» компанияси томонидан амалга оширилди. Компания жорий йилнинг I-чораги якунларига кўра давлат бюджетига 85 минг евро миқдорида маблағ тўлади.
Давлат солиқ қўмитасига ҚҚС-офиси орқали рўйхатдан ўтиш учун хорижий компаниялардан аризалар келиб тушиши давом этмоқда, дейилади хабарда.
Маълумот учун, Солиқ кодекси билан 2020 йилдан бошлаб Ўзбекистон Республикаси ҳудудида жисмоний шахсларга хизматларни электрон шаклда тақдим этадиган хорижий компаниялари учун қўшилган қиймат солиғини (ҚҚС) тўлаш жорий этилган эди.
